Hollywood 4

„Ef þú selur heimildamynd sem er gerð í Evrópu til USA og hún fær sýningu í auglýsingasjónvarpi þá er nokkuð öruggt að gerð er krafa um endurklippingu útfrá auglýsingaslottum.  Þau koma samviskusamlega á 10 -15 mínútna fresti. Kúnstin er að klippa smá æsing rétt fyrir hvert slott þannig að áhorfendur sem þjóta í eldhúsið og fá sér majonessamloku,bjór eða jónu nenni að koma aftur að horfa“  Þetta sagði mér ólyginn innkaupastjóri á heimildamyndamessu sem ég tók þátt í fyrir nokkrum árum. Trúlega bullsh eða hvað ...  allflestar bandarískar kvikmyndir virðast gerðar fyrir majonesin. Ef setningin er of löng eða djúp fer myndin ekki í bestu bíóin. Þess vegna eru sérstakir bíósalir í USA fyrir þá sem komast í gegnum langar setningar án þess að sofna. Ekki er ég frá því að við séum að verða alveg eins enda hrifnir af Kananum og því sem hann hefur uppá að bjóða.  Ég náði mér í mynd um daginn sem ég tel eina mestu mynd allra tíma, stríðsádeiluna Come and See (Idi i smotri) eftir rússneska leikstjórann Elem Klimov. Mynd sem ég skoða með reglulegu millibili til að slípa stríðsandúð og horfa á gargandi snilld í leiðinni. Ég bauð félögum í heimabíó en þegar við vorum komnir inní miðja mynd voru þeir sofnaðir. Ég veit svo sem ekki hvern fjandann ég var að reyna vitandi að þessir góðu vinir mínir eru báðir Seagal menn og hlakka mikið til að sjá Die Hard 4 næsta sumar.

Framhaldsmyndasumar í Hollywood

Athugasemdir

[Jón Steinar Ragnarsson, 18.4.2007 kl. 00:42]

Þetta skemmti mínum litla skratta.  Akkúrat svona er þetta.  Ég fór í í bíó í Smáranum, þar sem ég þurfti að sitja í reykjarkófi og lasergeislasjói í tíu mínútur áður en klénum auglýsingum var troðið ofan í kokið á mér í annað korter, svo kom mynd með svona súmmpásum eins og í Guiding Light, súmmað að augum-hlé-súmmað að augum aftur og haldið áfram.  Söguþráðurinn komst fyrir í einni setningu. "Menn fremja rán og deyja."

Trönurnar fljúga er rússnensk mynd, sem ég held mikið upp á. Einmitt um tilgangsleysi stríða. 

[Birgir Guðjónsson, 18.4.2007 kl. 01:22]

Sæll Pálmi,

Ég minnist þess að hafa horft á "sovétskan" sakamálaþátt sem sýndur var á Rúv, veturinn 1979 eða 80. Ég var einn af örfáum á landinu sem fylgist með þessum þáttum, en þeir voru 15-20, talsins.

Það gerðist ekki mikið í hverjum þætti. Í einum þættinum man ég að spæjarinn fór út í skóg á Volgunni, fékk sér að reykja, horfði á ægifagurt landslagið, hugsaði síðan verulega mikið og allar hugsanir komu fram sem texti. Þetta hefði ekki gengið í dag en ég hafði gaman af þessu.

Þessi mynd Come and SEE, er hún nýleg og fæ ég hana á næstu leigu?

[Pálmi Gunnarsson, 18.4.2007 kl. 11:00]

Ég nýtti mér að fara í grænt bíó um daginn. Þvílíkur lúxus. Svo fór ég í Kringlubíó með dóttur minni á páer sýningu með poppkókostaflöguívafi. Ekki sambærilegt.

Come and See færðu Birgir á bestu videóleigu landsins Laugarásvideói. Ég nefndi myndina við strákan sem reka leiguna og hún var komin í hillu skömmu síðar. Þeir segja reyndar að hún sé ekki mikið inni. Steven Spielberg lét hafa eftir sér eftir frumsýningu myndarinnar Saving Privat Ryan að hann ætti lítið í myndinni og vitnaði í leiðinni í Come and See.  Ekki finnst mér nú myndirnar líkar en segir nokkuð um álit kvikmyndagerðarmanna á Elem Klimov.