Fréttir og EKKIfréttir!

Þegar ég las þessa frétt, sem m.a. fjallaði um handtöku konu í annarlegu ástandi í miðborg Reykjavíkur, datt mér í hug hvort ekki væri athugandi hjá mbl að hafa sérstakan dálk þar sem sagðar væru daglegar fréttir af fólki sem er í annarlegur ástandi í miðbæ Reykjavíkur af völdum áfengisneyslu. Frétt eins og þessi finnst mér dæmigerð EKKIfrétt, skilar engu inní forvarnarumræðuna, eykur aðeins andúð hins almenna borgara á „helvítis eiturlyfjapakkinu“ í stað þess að beina athyglinni að því sem raunverulega skiptir máli.

 

Fíkniefni fundust við húsleit í Breiðholti

Athugasemdir

[Jenný Anna Baldursdóttir, 26.4.2007 kl. 15:25]

Svo sammála, svo sammála.

[Ómar Ragnarsson, 26.4.2007 kl. 15:59]

Góður!

Þetta minnir líka á það þegar sérstaklega er tekið fram að viðkomandi hafi verið "af útlendu bergi brotinn" í fréttum af lögreglumálum.

Fræg var samsvarandi frétt hér í gamla daga í Degi af hundi sem beit mann á Akureyri og lögreglan handsamaði.

Í lok fréttarinnar stóð: "Þarna var um aðkomuhund að ræða."  

[Guðrún Magnea Helgadóttir, 26.4.2007 kl. 16:30]

Er ég silfurkristall eða hvað? Ég er íslensk!

[Auðun Gíslason, 26.4.2007 kl. 17:33]

Ég er algerlega sammála þér, en veit ekki nema kenna megi reynsluleysi og ungæðishætti um svona vinnubrögð. Samúð virðist vera það síðasta sem dúkkar upp í tilfinningalífi fólks, sem skrifar svona fréttir.

Annars er það ekki slæm hugmynd að hafa svona sérstakann dálk um fólk í annarlegu hugarástandi! Það mætti t.d. byrja á frambjóðendum djelistans!

[Guðrún Magnea Helgadóttir, 26.4.2007 kl. 18:29]

Hvernig væri að yfirvöld... Já ég sagði yfirvöld tækju á fíkniefnavandanum af alvöru? Hvað átti Framsókn við með slagorðinu:,, Fíkniefnalaust Ísland 2000".

Af hverju er löggan að ofsækja fíkla og stinga þeim inn ef þeir hafa einungis sér til sakar unnið að hafa innbirgt guðaveigarnar sem einhver Góður hefur flutt til landssins. Hverjir eru innflutningsaðilar fíknefna hérna á Íslandi?

[Þorkell Sigurjónsson, 26.4.2007 kl. 18:33]

Er ekki alveg með á nótunum þegar þú segir: í stað þess að beina athyglinni að því sem raunverulega skiptir máli, hvað er það í þínum huga sem skipir máli í umræðu og fréttum sem þú vilt sjá t.d.  Ég sem er óvirkur í dag og hef rjátlað við stút undanfarin 40 ár,  get ég lagt eitthvað til málanna um vímuefnamál annað en stunda AA fundi og vera virkur í starfi þeirra?

[Anna, 26.4.2007 kl. 19:00]

Þessar fréttir eru einmitt til þess gerðar að láta líta út fyrir að það gangi eitthvað í heilögu stríði yfirvalda gegn fíkniefnum.

Þetta er einstefnustríð og allar hugmyndir um að einhverjar aðrar leiðir gætu mögulega verið betri eru bara ekki teknar til greina því þá liti það út eins og þau væru búin að tapa þessu.  Þeir einu sem tapa hins vegar eru þeir sem eru fastir í viðjum fíknar eða smáneytendur sem hafa ekkert gert á hlut annarra heldur eru þeir gerðir að glæpamönnum fyrir að nota efni sem í mörgum tilvikum eru ekkert meira ávanabindandi eða hættuleg en tóbak eða áfengi...

[Pálmi Gunnarsson, 26.4.2007 kl. 19:19]

Ég heyrði í Nirði P Njarðvík vini mínum fyrir nokkru en hann vinnur málefnavinnu fyrir Samfylkinguna varðandi þessi mál.  Hann hefur víðtæka persónulega reynslu af lífi með fíkli og mér líkaði þær tillögur sem hann lagði fram. Þar er í það minnsta tekið á málum neytenda með þeim hætti að lagt er til að þeir fái aðhlynningu og umönnun í stað innilokunar í fangelsi. Það er skref í rétta átt. Mér óar við þeim hryllingi að loka óharðnaðan ungling inni í fangelsi fyrir neyslu. En ég segi enn og aftur ..  tökum slaginn heima fyrir eins og við getum, minnkum kúlið af því að vera á skallanum.

[Pálmi Gunnarsson, 26.4.2007 kl. 19:41]

Allt sem er bannað virðist hafa innibyggða framlegð í sér svo ég gerist nú kaupsýslumannslegur í tali. Munum bannárin í Bandaríkjunum eða smyglið á brennivíni, tóbaki og bjór hér heima. Trúlega hefur það verið fín aukabúgrein hjá sjómannastétt að smygla bjór þegar hann var bannaður. Innflutningur og dreifing á dópi er toppbisness meðan nóg er af kaupendum. Og þeir sem dreifa og selja reyna að sjálfsögðu að halda í kúnnahópinn og bæta við hann. Þegar t.d. dró úr neyslu kókaíns í Evrópu á sínum tíma hentu stórkaupmennirnir ódýru dóbi inná markaðinn og gáfu sýnishorn til að ná í nýja kúnna. En ég segi enn og aftur - pössum uppá líðið heima hjá okkur... minnkum kúlið við að vera skakkur.

[Guðrún Magnea Helgadóttir, 26.4.2007 kl. 20:07]

Ef sala á áfengjum drykkjum verður leifð í verslunum almennt og fólk hérna hættir að fá þá tilfinningu að neysla á áfengi svo sem bjór og víni sé ólögleg þá...

[Heiða B. Heiðars, 26.4.2007 kl. 21:47]

Þetta er engin fj... frétt. Þetta er óþolandi stýring á viðhorfi almennings og gefur fólki kolranga mynd.... og smá klapp á bak lögreglunnar í leiðinni. Ég hef átt skoðanaskiptum um svona mál þar sem fólk lítur nánast jafn alvarlegum augum á glæpahneigð einstaklings hvort sem hann finnst með lús af hassi til eigin nota í vasanum eða málningafötu fulla af kókaíni

[Steingrímur Helgason, 26.4.2007 kl. 22:26]

Einhver einhvern tíman hérna prófað að hugsa sér að bara láta vandann aðeins í friði ?

Er einhver tilbúinn í að taka undir það að því fé sem að er eytt til þess að 'bösta' einhver burðardýr & & berja sér á brjóst fyrir, væri mákse varið í meira virkandi forvarnarstarf, eða bara í virkandi meðferðarúrræði fyrir þá sem það vilja ?

Er miklu þjóðfélagsmeini forðað með að dæma unga krakka inn á hraunið, fyrir það að reykja hass..,

?

S.

[Ester Sveinbjarnardóttir, 26.4.2007 kl. 22:35]

Það skortir að taka á eiturlyfjavandanum af víðsýni og faglega.  Ríkið þarf að reka meðferðarheimili og koma inn með úrræði.  Börn á götunni sem neyta eiturlyfja á að kippa í burtu.  Koma þeim í lokaða skóla og í meðferðarúrræði og gefa þeim þannig möguleika á því að byggja upp vænlega framtíð. 

Þeir eiturlyfjaneytendur sem eru komnir yfir 18 ára aldur á að vista á sjúkrastofnunum, það þarf að taka á þessum vanda sem heilbrigðisvandamáli ekki félagslegu.

[Heiða B. Heiðars, 26.4.2007 kl. 22:41]

Steingrímur; Mætti a.m.k slaka aðeins á paranojunni yfir litlu "böstunum" og litlu "glæponunum" sem brjóta ekki lög nema bara þegar þeir kaupa sér kannabis til eigin nota. Síðan má hafa hasar og æsi-fyrirsagnir þegar þeir ná umtalsverðu efni og innflytjendum þeirra. 

[Heiða B. Heiðars, 26.4.2007 kl. 22:47]

Úff...ég get ekki látið þetta vera!!

Ester; "Ríkið þarf að reka meðferðarheimili og koma með úrræði"... já rétt. En það þarf líka að vera eitthvað sem tekur við fólki sem hefur verið háð fíkniefnum árum saman, jafnvel öll sín fullorðins ár þegar meðferð líkur. Svo þarf að hætta að henda fólki á Litla Hraun fyrir það eitt að mata fíknina sína.. þar sem þetta er viðurkennt sem sjúkdómur er alveg út í hött að henda fólki í grjótið án þess að setja í gang sjúkdómagreiningu og meðferð.. ARG, ég missi mig alltaf í þessum málaflokki.

Á sjálf 26 ára dóttir sem á líf sitt undir því að eitthvað verði gert. Og það fer ótrúlega í pirrurnar á mér þegar fólk segir hluti eins og "kippa þeim af götunni" "koma þeim í skóla".... Þetta eru ekki lausnir sem þú ert að færa fram, þetta eru frasar og þeir skemma meira fyrir en hitt 

[Heiða B. Heiðars, 26.4.2007 kl. 22:49]

Pálmi; Biðst afsökunnar á að misnota kommentakerfið þitt fyrir ræðu

[Steingrímur Helgason, 26.4.2007 kl. 22:50]

Heiða, hæ5 frá mér..

[Gunnar Th. Gunnarsson, 26.4.2007 kl. 23:39]

Peningunum væri betur varið í forvarnar og meðferðarstarf en í endalausan eltingaleik við neytendur. Hvað væri hægt að reka mörg battarí eins og SÁÁ fyrir lögguleikinn og fangelsisplássin sem eru uppfull af unglingum sem reikað hafa af réttri leið. Auk þess sem harmleikurinn verður jafnvel enn meiri við refsigleðina.

[Jens Guð, 26.4.2007 kl. 23:56]

Mér varð á að skella upp úr við lestur "komments"  Ómars Ragnarssonar um aðkomuhundinn.  Ég var í mörg ár áskrifandi að Degi (er/var Skagfirðingur og þyrsti í norðanfréttir).  Skondið var að fylgjast með fréttum blaðsins af óupplýstum innbrotum eða skemmdarverkum á Akureyri.  Þær enduðu yfirleitt á setningunni:  "Grunur leikur á að aðkomumaður hafi verið að verki."

[Heiða B. Heiðars, 26.4.2007 kl. 23:57]

Takk Steingrímur :)
Ég ætla ekki að hleypa mér í það að tjá mig meira um þessi mál hérna í kommentakerfinu hans Pálma. Á erfitt með að hemja mig þegar ég er byrjuð og nú þegar búin að "blogga" á bloggi annars manns;)

[Haukur Viðar, 27.4.2007 kl. 00:54]

Hahahaha "aðkomuhundur"

[Pálmi Gunnarsson, 27.4.2007 kl. 01:21]

Heiða - þú hefur fullt leyfi  til að nota bloggið mitt, bara heiður.  Gunnar, þakka þér fyrir innlitið og ykkur öllum fyrir að fjalla með mér um brýnt heilbrigðismál. Jú refsigleðin kostar sitt og engin spurning um að fjármunum sem fara í þessa vonlausu eltingaleiki væri betur eytt annarsstaðar. Alltof margir veikir einstaklingar deyja eða verða geðveikinni að bráð vegna ófullnægjandi meðferðarúrræða. SÁÁ er í stöðugu fjársvelti sem gæti leitt til lokana og ríkið er í tómu tjóni þegar kemur að meðferðarúrræðum eins og dæmi síðustu mánaða sanna. 

[Heiða B. Heiðars, 27.4.2007 kl. 01:34]

[Ester Sveinbjarnardóttir, 27.4.2007 kl. 06:14]

Sæl Heiða.  Fíklar hafa tilheyrt undir Félagsmálaráðuneytið, svo það er rangt að þeir séu skilgreindir sem sjúklingar í kerfinu, á þessu er mikill áherslumunur, því miður.  Þegar börn eru sett inn á meðferðarstofnanir fá þeir ekki lágmarks kennslu í t.d. íslensku, stærðfræði, þó svo þeir séu þar mánuðum saman.  Ef þú lítur á grunnskólalögin er það lögboðið að allir eiga rétt á námi við sitt hæfi.  Ríkið hefur brugðist í þessum málaflokki og það er sjálfsögð krafa okkar borgaranna að þeir geri eitthvað heildstætt í málunum.  Eftirfylgni og það að hjálpa fólkinu út í lífið aftur er aðeins hluti af úrræðunum.  Ég er ekki sammála því að það sé eðlilegt að börn búi á götunni og finnst það eðlilegt að þeim sé kippt þar í burtu.  

Brjóti fólk lögin er eðlilegt að það sé dæmt fyrir það, en þar aftur kemur að málaflokki sem ekki er heldur nógu vel staðið að.  Fangelsi eiga að vera betrunarvistir ekki refsivistir, á því er mikill munur.  Því miður hefur  sakafólk ekki fengið að umburðarlyndi og mannkærleika sem okkur ber að sýna okkar samferðafólki.  Hér er aftur málefni sem ríkið ætti að endurskoða og horfa á frá a - ö.  og hjálpa fólkinu að komast inn í samfélagið aftur og gefa því tækifæri á að njóta sín á ný.

[Rúna Guðfinnsdóttir, 27.4.2007 kl. 10:29]

Það er málið með afbrotin sem oftast fylgja neyslu. Ekki er hægt að horfa fram hjá þeim og greina sem sjúkdóm. Litla Hraun er hræðilegur staður fyrir unglinga og vantar, eins og allir vita, stað fyrir krakkana sem lenda utan vegar.

Annars mjög góður punktur með aðkomuhundinn. Það hefur alltaf farið í taugarnar á mér þegar tilkynnt er sérstaklega í afbrotafréttum að um útlending hafi verið að ræða. Það skiptir ekki máli, afbrotið er hið sama.

[Þórbergur Torfason (IP-tala skráð) 27.4.2007 kl. 13:01]

Þarna er mjög þörf umræða á ferðinni. Hluti af þessu er landburðurinn af fíkniefnunum. Þar sem áfengið er löglegt skulum við láta það liggja milli hluta að sinni. Refsikerfið er mikið umhugsunarefni. Hvernig væri t.d. að taka upp kerfi þar sem leitað er að fjármögnun kaupanna til innflutningsins. Þannig að til refsilækkunar kemur ef hægt er að rekja vöruna sífellt nær upprunanum. Hugsanlega er hægt að komast að uppsprettunni með því að lækka refsingu ef hægt er að rekja uppruna efnisins frá neytanda til sala, frá sala til fjármögnunaraðila. Þá væri hugsanlega tilgangi refilaga náð og fjármagnsaðilinn hengdur í orðsins fllstu alvöru því þetta eru einfaldlega morðingjar sem einskis svífast.

[Þórdís Bára Hannesdóttir, 27.4.2007 kl. 14:33]

Það er skrýtið að ríkið skuli ekki setja miklu meiri pening eimitt í að finna rótina það er sjálfa stórlaxana sem sjá um innflutninginn. Sennilega er ekki nægur hagnaður í því, peningalegur hagnaður.  Áhugann hreinlega vantar. Það hlýtur að vera skýringin.  Þetta skiptir ekki nógu miklu máli. 

[Pálmi Gunnarsson, 27.4.2007 kl. 16:20]

Með því að ná í stórkaupmennina má draga verulega úr innflutningi á vímuefnum það er rétt. Hinsvegar tel ég það nokkuð einsýnt að efnin verða flutt inn hvort sem okkur líkar betur eða ver meðan eftirspurnin er nóg. Frá því menn sprengdu fyrsta vínberið hafa menn ánetjast vímunni og munu gera áfram. Það sem fyrst og síðast þarf að vera í lagi hjá okkur er að sinna þeim sem eru fárveikir vegna neyslu og verja þá sem hugsanlega gætu ánetjast með því að sýna fram á tilgangs og innihaldsleysi neyslunna.

[Jón Kjartan Ingólfsson, 28.4.2007 kl. 01:31]

Við virðumst ósammála um margt, pólitískt séð, en þarna er ég fullkomlega sammála.

Mér finnst jafnvel koma til greina að lögleiða sem mest af þessu drasli. Í fyrsta lagi til að viðhalda ekki kerfi sem gerir eitulyfjainnflytjendur að milljónamæringum, en líka svo að það þessi grey sem eru föst í viðjum fíknarinnar séu ekki að kaupa sér eitthvað drasl íblandað rottueitri og ég veit ekki hvað. Skófla síðan þeim pening sem nú fer í að eltast við neytendur í auglýsingaherferðir og markaðssetningu á "ókúlinu" við dóp og brennivín. Berjast við eftirspurnina en ekki framboðið - það er löngu tapaður leikur.

[Pálmi Gunnarsson, 28.4.2007 kl. 14:58]

Jón ... takk fyrir innlitið bassabróðir og innleggið í umræðuna. Þegar kemur að kjarnamálum held ég að vel hugsandi fólk sé ávallt sammála. Pólitísk viðhengi sem fá að fljóta með, eru æði oft ekki til neins annars brúkleg en að æfa ræðukeppandann í okkur. 

[Gunnar Th. Gunnarsson, 28.4.2007 kl. 17:35]

Sammála Jóni Kjartani, baráttan við framboðið á efnunum er tapað. Þegar stór böst eiga sér stað þá hækkar verðið tímabundið en um leið skapast pláss fyrir nýherja á innflytjendamarkaðinum. Hass gæti flokkast sem hægdrepandi eiturefni en á meðan höndlun með það er vísun á fangelsi þá er stutt í tenginguna við bráðdrepandi (eða bráðskemmandi) efnin s.s. kók, amfetamín og e-pillur. Ég fiktaði við hassreykingar hér á árum áður og "dílerarnir" sem maður var í kontakt við voru stöðugt að ota að manni harðari efnunum, sem ég slapp sem betur fer við að nota. Þó ég sé alfarið á móti hverskyns eiturlyfjum þá held ég að það verði að gera greinarmun á efnunum. Slíta í sundur tenginguna á milli vægari og harðari efna. Ég er einungis að hugsa þetta út frá því að ná árangri í baráttunni við þessa vá.

[Gunnar Th. Gunnarsson, 28.4.2007 kl. 17:38]

Og vil bæta því við að "kúlið" hjá unglingunum felst meðal annars í því að þetta er bannað. Þeir sem höfðu góða kontakta hér í denn, hoppuðu upp í virðingastiganum. Það þarf að rjúfa þetta hugarfar og ekki gert öðruvísi en með öflugu forvarnarstarfi.

[Pálmi Gunnarsson, 29.4.2007 kl. 16:04]

Takk fyrir gott innlegg Gunnar ... vissulega er efnin misfljótdrepandi og eiga að fá greiningu í samræmi við það, gott að hafa í því sambandi í huga að það löglega stútar ennþá sem komið er flestum. Það sem sammerkir öll þessi efni hægt- eða bráðdrepandi er að þau róta í hausnum á þér með þeim hætti að stjórn fer fjandans til með þeim afleiðingum að flest það sem gerir okkur að fólki fer út á tún. Ég veit að kúlið liggur að stórum hluta í  forboðnu ávöxtunum, félagaþrýstingur og afskiptaleysi heimafyrir eru meginorsakir þess að  ungt fólk ákveður að prófa að drekka og dópa í fyrsta sinn. Það að vinna með forvörnum er tuff stuff ekki síst vegna þess að markaðurinn sem selur eitrið vill að sjálfsögðu ekki missa viðskipti hvort sem þar er um að ræða ríkið, eða fjárfestar sem fjármagna innflutning á dópi.