Mig dreymdi draum ...

... hann var einhvern veginn svona:

Ég er hættur að vinna og eyði áhyggjulaus tímanum í karabíska hafinu. Hringi heim til að athuga heilsufar minna nánustu, síðan stutt símtal við verðbréfamiðlarann þar sem við tökum stöðuna, ráðfæri mig við hann um kaup á bréfum í góðum fyrirtækjum. Skoða MBL. Allt í lukkunnar velstandi á klakanum, þjóðarsátt um fleiri virkjanir, fleiri álver í höfn. Herþoturnar frá kære nordiske farnar að æfa árásir á Akureyrarflugvöll, svona eins og þær frá USA í den. Dreg mannakorn dagsins:

Ég trúi á heilagan mammon, skapara velsældar minnar
Ég trúi á afhendingu þjóðarauðæva, einkavæðingu ríkisstofnana, misnotkun valds og létta spillingu
Ég trúi á flokkinn minn,
leiðtogann minn,
samfélag útvalinna,
fyrirgefningu smáyfirsjóna,
upprisu einkavæðingar
og eilífa kaupmáttaraukningu mína.
AMEN

Vakna.

Á næstu dögum leggst ég undir hnífinn og læt taka draumastöðina úr sambandi ... fyrir fullt og allt.

Athugasemdir

[Pálmi Gunnarsson, 27.4.2007 kl. 17:25]

nei nei ég er lásý lagasmiður, hef aldrei samið neitt af viti  - svo var þetta nú bara draumur

[www.zordis.com, 27.4.2007 kl. 17:29]

Draumaveröldin er hluti af þeirri veröld sem við lifum .... ekki láta skera draumstöðina í tætlur hjá þér!  

Lokaðu augunum og ........................   

[Ester Sveinbjarnardóttir, 27.4.2007 kl. 17:54]

Góður.

[Heimir Eyvindarson, 27.4.2007 kl. 17:58]

Halelúja

[Guðrún Magnea Helgadóttir, 27.4.2007 kl. 18:47]

Sæll Pálmi! Aldrei að láta taka draumastöðina úr sambandi, hún gerir okkur mögulegt að lifa hér á Íslandi. Nógu erfitt er að lifa hérna við núverandi spillingu stjórnvalda sem er raunveruleg. Dream on, er okkur nauðsynlegt

[Rannveig H, 27.4.2007 kl. 18:51]

Við deilum sama draumi,nema ég er ekki í karabíska heldur á mínu mótórhjóli um víða veröld

[Pálmi Gunnarsson, 27.4.2007 kl. 19:45]

ok ég læt bara erasa þessum leiðindum og læt mig svo dreyma eitthvað fallegt ... án herþota í æfingaflugi yfir Akureyri - eigið þið fallega helgi  

[Þorkell Sigurjónsson, 27.4.2007 kl. 19:56]

Þetta minnir svo sannarlega á Ameríska drauminn, eða þannig. Oftast er það nú fyrir hina fáu útvöldu sem njóta útsýnisins og góða loftsins, en allir hinir hafa  moldrykið og skítalyktina.

[Pálmi Gunnarsson, 27.4.2007 kl. 20:11]

Runólfur, þeir eru fínir dagdraumarnir og hægt að laga þá á alla vegu ... dauður er draumlaus maður sagði kona í minni sveit, sem átti eiginlega ekkert annað eftir en getuna til að láta sig dreyma. Ein besta manneskja sem ég hef nokkurntímann fyrirhitt á lífsleiðinni.

[Heiða B. Heiðars, 27.4.2007 kl. 20:54]

Þú ert góður penni Pálmi og segir skemmtilega frá. Gengur þú kannski með bók í maganum?

[Katrín Snæhólm Baldursdóttir, 27.4.2007 kl. 21:24]

Ef mig dreymir ekki held ég að ég sé dauð.

Á mér draum um veruleika sem tekur mið af mannkærleika og skilningi. Þekkingu sem nær út yfir gröf og dauða...til lífs sem hægt er að lifa ef maðurinn vaknar. Og ég er vöknuð út frá draumi og lifi hann núna vakandi. Þegar ég fæ heimþrá spila ég diskinn minn

Mannakorn. Megi það korn lifa lengi. Mitt Mannakorn Yfir brúnna.

[Benedikt Halldórsson, 27.4.2007 kl. 22:04]

Ég á mér draum að vera ríkur, og eiga eyjur og einkaþotur en þá fer ég að hugsa að að ég þurfi að fara að fylgjast með Tom Jones vísitölunni eða hvað hún heitir og þá missi ég áhugan en plan B er að fá að fara í bað þegar ég vil, á elliheimilinu.

[Kjartan Valdemarsson, 27.4.2007 kl. 22:17]

Bróðurpartur þessara athuga-semnda er óviðkomandi kjarna þess sem         -semndandi var að athuga.

Valkostirnir kristallast oft í draumum.

Vandamálið með bloggið er það að maður getur eiginlega ekki verið tvíræðin eða treyst á að fólk geti lesið á milli línanna.

Ég hef t.d. skrifað ath. til kunningja minna, sem blogga, þar sem ég höfða til þeirra kímnigáfu, en hef í kjölfarið fengið holskeflu athugasemda frá "bloggvinum" sem skilja ekki skopið, og hafa jafnvel farið að verja kunningjann.

Dream on!

(draumar mínir hafa stundum tekið mig til Kangia)

[Hugarfluga, 27.4.2007 kl. 22:55]

Ég verð nú bara að kommenta til að segja þér hvað ég held mikið upp á þig sem söngvara, Pálmi. "Opna dyr upp á gátt, til að bjóða mína sátt, það sem einu sinni var það getur lifnað við á ný .. lalala" Þú ert sko búinn að ylja mér um hjartarætur með röddinni þinni í gegnum árin. Gaman að þú skulir svo líka vera svona asskoti glúrinn bloggari! Rock on!

[Katrín Snæhólm Baldursdóttir, 27.4.2007 kl. 23:06]

Jamm sammála Hugarfluga mín...þegar ég vil muna landið hlusta ég á mannakornið og þegar íslendingar koma í heimsókn stendur partý fram til morguns með Garúnu.

[Pálmi Gunnarsson, 27.4.2007 kl. 23:34]

Heiða - ég hef alltaf haft ánægju af að segja sögur, en ekki síður að heyra þær frá öðrum, trúi að ég láti þar við sitja.

Benedikt - við popparar bjuggum til DAP sem stóð fyrir Dvalarheimili Aldraðra Poppara. Það var útópiskt dvalarheimili þar sem rótaranir okkar gengu á milli herbergja með vindla, vín og gleðipillur fyrir þá sem voru niðurlútir. En tilhugsunin um að komast í bað á elliheimilinu er ekki svo slæm miðað við þéttsetinn bekkinn.

Kjartan vinur -  Kangia bíður bara eftir okkur, búið að byggja skemmtilegan veiðikofa oná klöppinni við ósinn og Adam í stuði.  Svo er það Paradísardalur við Ketilfjörð. Lísa í Undralandi ólst þar upp þangað til hún flutti til Englands. Risasveppir og vængjaðar risableikjur við hvert fótmál.

Hugarfluga og Katrín: takk fyrir hlý orð og góða helgi.

[Steingrímur Helgason, 27.4.2007 kl. 23:57]

Mig eiginlega grunar að sjallaballarnir séu ekki alveg að ráða í drauminn þennann, já, eða var þetta máske ljóðræn martröð ?

S.

[Ásdís Sigurðardóttir, 28.4.2007 kl. 00:20]

Það mætti halda að þetta væru skrifa hjá Bjarna í Glitni, svona gæti þetta orðið hjá honum, moldríkur í útlöndum no worrys.

[Anna Ólafsdóttir (anno) (IP-tala skráð) 28.4.2007 kl. 00:28]

Ef ég þekki skopskyn höfundar rétt held ég að Steingrímur hitti naglann á höfuðið. Ef ég á að ráða í drauminn áttu þessi mannakorn ekkert skylt við samnefnda hljómsveit er það nokkuð? Mannakornin voru nú líklega þessi biblíuorð, sem sett eru í lítil box og fólk sem lifir bókstaflega eftir drottinsorði dregur eitt spjald á dag sér til leiðsagnar Það er líklega frekar slæmur draumur að lenda á „trúar“játningu hins helbláa þegar maður í sakleysi sínu seilist í biblíuboxið ???? Næsta skref hlýtur að vera fyrirbyggjandi aðgerðir svo þú slysist ekki á að kjósa bláa herinn t.d. í svefni

Flottir pistlar! Fottur penni! - Nú fæ ég Heiðu í lið með mér til að ná bókinni úr maganum