Hjálpum þeim !

Til að bjarga þjóðarsál frá glötun legg ég til að við sleppum kosningunum 12 maí.  Leyfum stjórninni sem nú situr að sitja áfram með þeim skilyrðum að hún taki þátt í mikilvægri tilraun. 

Tilraunin felur það  í sér að leiðtogarnir fá frí frá Austurvelli næstu tvö árin en taka sér þess í stað fyrir hendur ákveðin störf. Enginn mun fetta fingur út í það og þaðan af sakna þeirra. Það væri nóg að skilja Pétur leiðtoga Blöndal eftir til að sjá um að kynda kofann. Honum til halds og trausts væri Sverrir Hermannson sem ráðinn yrði sérstaklega til að halda uppi móralnum hjá þjóðinni. Það færi fram í beinni útsendingu frá Alþingi á hverju kvöldi eftir fréttir. Hann var jú lengi vel eini maðurinn í þingsölum sem hægt var að hlusta á án þess að hugsa ljótt.

Valin yrðu sérhæfð störf fyrir leiðtogana. 

Félagsmálaleiðtoginn fengi starf einstæðu móðurinnar sem vinnur á dagheimili 5 daga vikunnar; skúrar á hverju kvöldi og ber út Moggann um helgar. Sá fengi að sjálfsögðu sömu laun og byggi við sömu aðstæður og konan sem sinnir því smáræði. Að sjálfsögðu þyrfti líka að svipta hann öllum þeim þægindum sem gætu afvegaleitt hann í tilrauninni. Síðan yrði fylgst með geðheilsu hans af færustu sérfræðingum og all fært til bókar. 

Nýskipaðan Iðnaðarleiðtoga mætti setja í það æsispennandi verkefni að hnoða saman ævisögu Finns hins unga Ingólfssonar, seðla – og verðbréfasafnara með meiru.  Að koma slíku ritverki saman tæki örugglega mjög langan tíma og minnkaði líkur á að Iðnaðarleiðtoginn gæfi óábyrgt leyfi fyrir fleiri álverum. Ævisagan gæti heitið Forever young.

Utanríkisleiðtoganum væri gert að vinna kauplaust sem auglýsingastjóri hjá Friði 2000. Jafnframt að verja öllum sínum frístundum sem jólasveinn við að safna pökkum fyrir fátæku börnin í einhverjum þeirra landa sem verið er að skjóta á af vinum okkar í Ameríku. Og einu sinni á ári færi hann fyrir hópi sjálfboðaliða sem leita að ósprungnum jarð- og klasasprengjum. 

Fleiri störf í undirstöðuatvinnuvegunum mætti finna handa  minni spámönnunum í leiðtogaliðinu t.d. gæti Heilsuleiðtoginn sinnt heimahjálp og gengið í hús á kvöldin og selt prjónles til styrktar gamla fólkinu sem á ekki fyrir nauðþurftum. Prjónlesið yrði leiðtoginn að sjálfsögðu að vinna sjálfur. Ef vel lægi á honum gæti hann stýrt spilakvöldum til skemmtunar fyrir gamla fólkið og sungið það í svefn ásamt Félagsmálaleiðtoganum.

Umhverfisleiðtoginn fengi umsvifalaust vinnu í álkerskála við uppsóp, eins yrði leiðtoganum gert að lesa allt sem til er um flóru Íslands og fuglalíf og taka síðan próf í herlegheitunum.

Forsætis - og Fjármálaleiðtoginn  yrðu skikkaðir til að vera heima hjá sér. 

Öllu leiðtogaliðinu yrði jafnramt gert að taka þátt í prófun nýrra lygamæla sem fyrirtæki í hátæknigeiranum yrði sett í  að hanna og framleiða sérstaklega fyrir stjórnmálamenn. Sett yrðu á lög um að  allir þeir sem kosnir yrðu á þing bæru mælana sem hefðu þann eiginleika að spila lag með Árna Johnsen þegar einhver segði ósatt.

Athugasemdir

[Guðmundur G. Hreiðarsson (IP-tala skráð) 7.5.2007 kl. 16:10]

Brillíant ídé, Pálmi !

[Björg F (IP-tala skráð) 7.5.2007 kl. 16:39]

Stórkostlegt.. styð þetta Tuð-laust  

[Guðmundur Ragnar Björnsson, 7.5.2007 kl. 17:00]

Það er með þig Pálmi eins og fleiri að þið þorið ekki að segja neinum til syndanna sem getur svarað fyrir sig. Ef þessi ríkisstjórn hefur staðið sig svona illa eins og þú ert að halda fram afhverju klárast upptalningin þegar Framsóknarmönnunum sleppir? Var þetta svona æ ég er að gleyma einhverjum hmm Geir og Árni verða bara heima. Hvað með Sturlu, Einar Guðfinns, Björn Bjarna og Þorgerði Katrínu? Fá þau ekkert að vera með eða eru menn hræddir við bláu höndina?

Alveg í fínu lagi að gera grín en eins og Sóley Tómas segir þá verður að vera jafnrétti í því líka.

[Pálmi Gunnarsson, 7.5.2007 kl. 17:23]

hum hvaða bláu hönd Guðmundur - ég hélt að hún væri orðin græn eins og fálkinn  ...  varðandi þau sem ekki eru með, ég bara fann ekkert fyrir þau að gera  -    

[Ásgeir Rúnar Helgason, 7.5.2007 kl. 17:36]

Anarkisminn hefur eignast nýjan spámann! Ég stend ennþá stoltur í skugganum af slíkum Pálma!

K:

[Pálmi Gunnarsson, 7.5.2007 kl. 18:40]

Sæll Ásgeir ..  það er nú stutt í hann hjá okkur öllum held ég ... annars bý ég svo vel að tilheyra hópi sem lýtur engri stjórn en virkar svona dásamlega -eiginlega næstum fullkomlega.

[Rúna Guðfinnsdóttir, 7.5.2007 kl. 18:40]

Ég hugsa að þau myndu deyja það er svo langt síðan þau hafa unnið ærlegt handtak. Það væri gaman að sjá þau reyna

[Gísli Hjálmar , 7.5.2007 kl. 18:51]

Góður ...

[Jóna Á. Gísladóttir, 7.5.2007 kl. 21:26]

Brilliant samantekt Pálmi.

[Katrín Snæhólm Baldursdóttir, 7.5.2007 kl. 21:43]

"Sameinusmt hjálpum þeim..sem minna mega sín..þau eru systskyn þín"

Þetta mætti svo vera morgunmantra ríkisstjórnarinnar.

[Guðsteinn Haukur Barkarson, 7.5.2007 kl. 22:29]

Pálma á þing! Ég segi nú ekki annað, þú myndir bjarga landsmálunum með svona snilldar tillögum !

[Guðrún Þóra Hjaltadóttir, 7.5.2007 kl. 23:07]

Góð hugmynd Pálmi. Ætli það væri ekki verið að spila Árna allan daginn???

[Haukur Viðar, 7.5.2007 kl. 23:46]

Ég væri til í að sjá þetta. Senda svo restina í malbikið

[Jóhann F Kristjánsson (IP-tala skráð) 8.5.2007 kl. 09:17]

Endirinn á blogginu "Sett yrðu á lög um að  allir þeir sem kosnir yrðu á þing bæru mælana sem hefðu þann eiginleika að spila lag með Árna Johnsen þegar einhver segði ósatt." er náttúrlega bara snilld. 

[Helga (IP-tala skráð) 8.5.2007 kl. 11:23]

Þótt að þetta fólk þyrfti ekki að gera annað en að reyna á pappírum að láta fjármálin ganga upp.

Og það sem að mér finnst virkilega þurfa að taka á og breyta eru þessar blessuðu nefndir. ´Til að starfa í þeim þarf merkilegt nokk enga þekkingu á umfjöllunarefni því sem að nefndin á að taka fyrir. Engin tímamörk virðast vera á því hvenar verkinu á að ljúka og engar heilsteyptar kröfur um það að nefndir skili mati sem stenst rök og raunveruleika.  Og svo ef að mat nefndar stangast á við það mat sem sóst var eftir, þá fer lítið fyrir niðurstöðum nefnda.

Fyrir þá peninga sem að hefur verið sólundað á þennan  hátt væri margt hægt að gera.

Lengja frí Alþingismann, hækkað laun þeirra, aukið eftirlaunaréttindi þeirra nú og greitt aðra fótboltaferð til Færeyja fyrir hvert það ráðuneiti sem vill.

[Sigurlaug B. Gröndal, 8.5.2007 kl. 11:33]

Þetta er algjör snilld Pálmi. Það þyrfti að prófa þetta í reynd! Bendi á snilldargrein sem Guðfríður Lilja skrifaði í Mbl. á laugardaginn s.l. sem bar yfirskriftina "Vinnukonur kerfisins". Það er margar vinnukonur kerfisins hér á landi. Allir hafa gott af því að lesa hana og hugsa til þeirra mörgu kvenna sem manna stofnanir heilbrigðiskerfisins og fórna fjölskyldunni og lífi utan stofnananna á aukavöktum fyrir lúsarlaun.

[Pálmi Gunnarsson, 8.5.2007 kl. 13:57]

Sigurlaug - ég las ekki greinina hennar Guðfríðar en ætla að finna hana og lesa.

Öllu gríni fylgir alvara  ...  mér blöskrar misskiptingin í þjóðfélaginu sem blasir við mér hvern einasta dag. Ég fyrirverð mig fyrir að eiga þátt í því hvernig komið er fyrir þeim sem hafa minnst á milli handanna því svo sannarlega hef ég ekki lagt nægjanlega mikið af mörkunum í baráttunni fyrir betra lífi þeim til handa.  Það sorglega er að við kjósum alltaf sömu leiðindin yfir okkur, trúum í blindni á loforðavaðalinn og látum svo svikin loforðin yfir okkur ganga.  Sem minnir á þann sem gengur daglega um í alltof þröngum skóm til að upplifa þægindin af því að fara úr þeim á kvöldin.

[Aðalheiður Haraldsdóttir, 8.5.2007 kl. 18:35]

Frábær hugmynd.  Ég hef stundum velt því fyrir mér, í ljósi veruleikasjónvarpsþáttabyltingarinnar, hvort ekki mætti gera þátt um einmitt svona efni - þar sem ráðamönnum þjóðarinnar væri fylgt eftir og þeim gert að setja sig í spor venjulegs fólks í landinu - einstæðu foreldranna, öryrkjanna, unga fjölskyldufólksins sem er að reyna að eignast þak yfir höfuðið o.s.frv.  Ef þeim tækist ekki að láta enda ná saman í einn mánuð væri þeim gert að gefa sín eigin mánaðarlaun til góðgerðarmála.  Það væri virkilega gaman að sjá þá reyna.

[Guðrún Magnea Helgadóttir, 8.5.2007 kl. 18:38]

Kæri Pálmi! Ljúft er að láta sig dreyma ENN. Alshæmer og heimska LANDANS lætur ekki að sér hæða...

[halkatla, 8.5.2007 kl. 18:42]

vá þvílík snilld

[Hugarfluga, 8.5.2007 kl. 19:30]

Bíddu ... afhverju ert þú ekki á þingi?? Snilldin ein!

[Sóley Valdimarsdóttir, 8.5.2007 kl. 19:48]

Frábær hugmynd. Reyndar hef ég aldrei skilið afhverju það þurfa að vera svona margir þingmenn (sem gera aldrei neitt nema korter fyrir kosningar) Það er nóg að hafa einn forstjóra, landinn telur svo fáa að við erum eins og eitt fyrirtæki í japan.

[Katrín Snæhólm Baldursdóttir, 8.5.2007 kl. 21:24]

Það er ekki nóg að taka í lurginn á og tugta til ráðamenn..það þarf líka að hrista aðeins upp í þjóðarvitundinni og fá fólk til að vakna og sækja rétt sinn.

[Pálmi Gunnarsson, 8.5.2007 kl. 21:57]

Hmm  -  raunveruleikaþáttur - vá  HALLÓ HALLÓ Stöð 2!!   RUV !!  Simon Cowel -  einhver -  Ég sé það fyrir mér í anda þegar liðið er látið fara heim eftir misheppnaða stóriðjuframkvæmd eða vondan leik í auglýsingu. Það væri allavega afar auðvelt að senda menn heim útá þetta tvennt ef svona þáttur væri í gangi nákvæmlega núna.    

[G.Helga Ingadóttir, 9.5.2007 kl. 23:03]

Styð allar þessar hugmyndir og það er ljúft að láta sig dreyma!

Að ganga í þröngum skóm almúgans er það sem að þau ættu að skylda til að gera, í svona 3 mánuði. Svokallaður reynslutími, áður en þjóðin er tilbúin að setja þetta fólk á þing á launum og í ráðherrastóla.

[Kristján Logason, 9.5.2007 kl. 23:42]

Gargandi Snilldar hugmyndir og ekkert annað

[Gunna-Polly, 10.5.2007 kl. 08:07]

ég lýt höfði af hrifningu yfir þessari hugmynd