Ákall um frið

Á þessum tíma ársins kallar náttúran stöðugt til mín og býður uppí leik. Þannig hefur það verið frá því ég var smápjakkur heima á Vopnafirði en þar var ég staddur fyrir nokkru og  upplifði umhverfið, fólkið,ræturnar, sterkar og ákveðnar en nokkru sinnum fyrr. Eftilvill var það dóttir mín sem var með mér sem ýtti undir þessar tilfinningar, hún hefur alveg ódrepandi áhuga á uppruna sínum, er náttúruunnandi í hugsun og hegðun. Eftilvill sækir á mig sú nöturlega staðreynd að mannkyn, upplýst um allt milli himins og jarðar nýtir gáfurnar að mestu til að þjóna eiginhagsmunum og gefur því miður dauða og djöful í það sem koma skal. Stundargræðgisvæðingin er allráðandi og merki hennar hvert sem litið er. Eftilvill er ég að ganga í gegnum eitthvað sorgarferli eins og maður gerir þegar ástvinur kveður í þessu tilfelli væri ástvinurinn náttúran, landið okkar, jörðin sem við búum á. Það blasir við að innan skamms verður varla líft á jörðinni vegna þess hvernig við förum með. Þessvegna finnst mér svo mikilvægt að við sem byggjum okkar fagra og einstaka land hverfum af braut eyðileggingar inná braut friðar. Friðar til handa náttúru landsins sem er þegar upp er staðið það sem við byggjum allt á. Framtíð afkomenda okkar stendur og fellur með því að við skilum af okkur mannsæmandi búi, ekki í formi feitra bankabóka heldur vistvæns umhverfis.

Athugasemdir

[Haukur Nikulásson, 16.6.2007 kl. 12:45]

Þetta er blús Pálmi, blús. Kannski tilefni fyrir þig að grípa í exina og hleypa þessu í annan farveg.

Á skáldminni nótum finnst mér þú örvænta um of. Jörðin er síbreytileg og það hefur aldrei verið neitt á henni sem heitir stöðugt ástand. Maðurinn og hin kvikindin sem byggja þessa jörð breyta henni mun minna en hún sjálf með aðstoð Sólarinnar, Tunglsins, eldgosa, loftsteina, flóða og veðurhams. Af þessum orsökum er kúlan okkar jafn margreytileg og raun ber vitni.

Láttu ekki ábyrgðartilfinninguna bera þig ofurliði. Góða helgi. 

[Pálmi Gunnarsson, 16.6.2007 kl. 13:03]

Haukur - ég er ágætlega að mér um sögu jarðar. Hinsvegar fellur mér illa að benda á annað til að bæta böl. Í mínum huga verður það aldrei afsökun fyrir okkar eigin drullumalli að benda á sól, tungl, eldgos, loftsteina, flóð og veðurham.  Og mér líður alltaf vel á blús því hann kemur yfirleitt ekki nema ég sé að hugsa um eitthvað sem skiftir máli.  Eigðu sjálfur góða helgi.

[Ásdís Sigurðardóttir, 16.6.2007 kl. 15:09]

Fegurð náttúrunnar okkar bætir sálina í okkur og gleðina í hjartanu. Hrein og klár skemmdarverk á náttúrunni hafa vond áhrif á mig, alveg eins og ill meðferð á dýrum og öðrum málleysingjum, þá blæðir úrhjarta mínu. Mannskepnan er grimm, grimmust segi ég oft. Hafðu það gott um helgina.

[Heiða Þórðar, 16.6.2007 kl. 23:53]

Sammála þér Pálmi. Góða helgi, allar helgar.

[Margrét St Hafsteinsdóttir, 17.6.2007 kl. 00:45]

Friður og fallegt og heilnæmt umhverfi er það sem við eigum að arfleiða afkomendur okkar að, sú ætti að vera stefna okkar allra. Góður pistill hjá þér og ég er þér alveg sammála. Knús til þín

[Ólafur Þórðarson, 17.6.2007 kl. 00:49]

Stórskemmd á náttúru má ekki skemma vilja okkar til að halda áfram. Auðvitað verður hægt að búa á jörðinni þrátt fyrir breytingar og skemmdir græðgisafla.

[Ásgeir Kristinn Lárusson, 17.6.2007 kl. 12:21]

Takk fyrir hugleiðinguna - vinur minn er nýkominn frá Kína og það sem stakk hann einna mest var að á bak við hvert hrísgrjón, sem þarlendur bóndi stingur í jörð, er hugsun um komandi kynslóðir, að yrkja jörðina í sátt og með þarfir þeirra í huga, sem á eftir koma.

[Margrét St Hafsteinsdóttir, 17.6.2007 kl. 13:38]

Gleðilegan þjóðhátíðardag frændi

[Guðrún Magnea Helgadóttir, 17.6.2007 kl. 17:39]

Sæll Pálmi. Ég er ekki jafn skáldleg sem hinir aðrir sem hafa tjáð sig hérna á undan mér... Það sem mig langar til að tjá mig um í sambandi við ást á rótunum frá barnæsku skil ég mætavel... Ég er sjálf náttúrubarn fædd í Borgarfirðinum en nýt mín hvern dag á göngu og skokki víðsvegar hérna innan borgarmarkanna. Austurlöndin fjær hafa einnig náð til mín eftir fjölda heimsókna þangað og þau eiga hug minn allan þegar kólna tekur á landinu bláa.

[Ester Sveinbjarnardóttir, 17.6.2007 kl. 22:07]

Það merkilega við þetta allt er að ef við öll sameinumst í því fylgja eftir leiðbeiningum Vistverndar (Landvernd) og tökum til í eigin ranni á jörðin sér von.

[Karl Tómasson, 18.6.2007 kl. 00:51]

Haukur talar um blús. Það skal ég taka undir með honum en á mig virkaði hann uppbyggjandi eins og gott lag. Mig langaði í meira og meira.

Þetta var kröftugur blús Pálmi minn.

Engin veit hvað átt hefur fyrr en mist hefur.

Kær kveðja frá Kalla Tomm úr Mosó.

P.s. Ég hef sagt þér þetta áður minn kæri, þegar þú og þínir menn í Mannakornum komuð í Mosó einmitt á 17. júní fyrir 10 árum síðan, já 10 árum. Þá vildu allir meira þvílíkir tónleikar.

Bestu kveðjur frá Kalla Tomm úr Álafosskvosinni.

[Sóley Valdimarsdóttir, 18.6.2007 kl. 22:33]

Enn leiðinlegt að tónleikar ykkar Magnúsar hafa verið frestaðir hér á Eskifirði á morgun Vona svo sannarlega að ég verði heima þegar þeir verða.

Kv.  Sóley V.

[Pálmi Gunnarsson, 19.6.2007 kl. 19:03]

Ég skal viðurkenna að trú mín á mannkyn er fallandi þegar ég lít yfir afrekaskrána. Þrátt fyrir þokkalegan heilabúskap manneskjunnar er hún verri sjálfri sér en nokkuð annað afl og hefur sjaldan verðið sér verri. Fyrir tíma gáfuapans, meðan við ráfuðum um gresjurnar, veiddum til að komast af, týndum lýs af vinum og vandamönnum og sögðum fátt, hefur náttúran að mestu verið í góðu jafnvægi. Nú er öldin önnur. Við stútum hvort öðru í akkorði, svindlum og svínaríumst á öllu og öllum og það sem verra er, viðurkennum sjaldnast að við séum að gera nokkuð rangt af okku.

En hæ, ég var að koma úr yndislegri ferð í Vatnsdal þar sem skriður hafa fallið  og breytt hinu og þessu, landi og mannlífi. Sagan er skráð í hvert fótspor og þegar horft er af hæðinn þar sem Þingeyrarkirkja stendur inneftir Vatnsdal og yfir að Viðidal skil ég af hverju ég er ekki farinn eitthvað suður á bóginn þar sem hitinn vermir. En ég er nú samt að hugsa um að flytja í sólina einn góðan veðurdag.

[Jón Steinar Ragnarsson, 20.6.2007 kl. 13:06]

Lestu Ný Jörð eftir Eckhart Tolle.  Maðurinn er góður en það er egóið, sem er að gera út af við hann.  Einnig er athyglisverð lesning að lesa The Fall eftir Steve Taylor, sem fjallar um sögu egósins á jörðu.  Maðurinn hefur á hinn bóginn æðra sjálf að baki þessu egói og þar er hann eins í grunninn, friðelskandi og góður.  Egóið þarf alltaf að vera annarstaðar en það er, það skortir ávallt eitthvað og er uppfullt af ótta um skort og vill því hafa stjórn á öllu og öllum.  Egóið er bundið tímanum og er aldrei í núinu, heldur í fortíð og framtíð. Egóið þarf merkimiða:  Ég er þetta eða hitt, ég á þetta eða hitt eða ekki, aumingja ég, ég er bestur, etc.  Að þessum merkimiðum slepptum, þá er égið og tíminn ekki til.  Aðeins ég er.  Í núinu er friður, í núinu er ekkert ég er eitthvað heldur bara ég er.  Í núinu skortir mann ekkert.  Enjoy everything, need nothing....Friðurinn er fyrir hendi og hann er í þér núna....akkúrat núna. Óeirðin er aðeins í egóinu.  Æðruleysisbænin okkar fjallar í raun um þetta ef grant er skoðað.

[Benedikt Halldórsson, 21.6.2007 kl. 20:20]

Kannski er thad sólinn...en heimurinn á bara eftir ad batna, fyrir utan allskonar "óleysanleg" vandamál er flest á réttri leid....meira um thad seinna...

[Ásgeir Rúnar Helgason, 24.6.2007 kl. 23:03]

Sæl félagar!

Var að koma heim eftir að hafa hlustað á frábæran fyrirlestur um hitasveiflur á jörðinni síðastlini ca. 100.000 ár. Er verulega farinn að efast um að upphitun jarðarinnar núna sé okkur að kenna?

Ég meina: Hverju reiddust goðin þegar Pálmar (eða alla vega Bjöggar) uxu villt á Ísalandinu fyrir þúsundum ára.

Eða þannig:

[Pálmi Gunnarsson, 25.6.2007 kl. 12:35]

Humm Ásgeir ...  - fyrirlestur um hitasveiflur, alltaf gott að skoða gröf .. en ekki bætir það útganginn á okkur mannsveskjum sem virðumst halda að stjarnan sé sérstakelga búin til fyrir rusl og drasl.

[Steinunn Helga Sigurðardóttir, 29.6.2007 kl. 07:24]

sammála, þér Pálmi ! Njóttu sumars, ilm af grasi og þögn á hálendi sem ég man svo vel frá íslandi. man líka að það er hægt að drekka vatn úr lækjum !

Dásamlega land, ég sakna hennar oft !

Gleðilegt sumar, megir þú eiga fallegasta og besta sumarið !

Ljós til þín

Steina

[Rúna Guðfinnsdóttir, 29.6.2007 kl. 16:05]

Ég er alls ekki viðræðuhæf um þetta málefni þar sem ég er svo afskaplega lítill náttúruunnandi. Kannski er Það af því ég tel þetta sjálfsagt..annarsvegar af því að mér hefur verið sama um hálendið ...hálendið, þar sem enginn stígur fæti . Hvers vegna ekki að virkja það sem landið býður uppá?? Hvers vegna ekki að byggja upp og veita fólki atvinnu?   Er eitthvað annað við hálendið að gera? Er ekki nóg eftir handa þeim sem vilja klífa fjöll og eyða tíma úti í náttúrunni?  Þetta er ekki illa meint..kannski er þetta bara einskær fáviska..vankunnátta?    Fræðið mig!                                                           

[Ingibjörg Álfrós Björnsdóttir, 29.6.2007 kl. 19:19]

Vopnafjörður er afskaplega fallegur staður.  Hraunklettarnir sem ná út í sjó og tignarleg fjöllin.  Allir sem alast upp í slíku umhverfi hljóta að fá næma tilfinningu fyrir náttúrunni.