Litla Jólaönd ra ra ra ra ra

Kæru landar - eins og ég hef lofað ykkur þá mun allt verða betra eftir að ég hef tekið við.  Reyndar er ég tekinn við þannig lagað, en hef ákveðið að fresta krýningu meðan verið er að laga til eftir víkingana mína. Enda öndin hógvær og lítillát að upplagi. Ég hef þó haft nokkuð með mál að gera eftir að ég kom til landsins og hef hitt ábyrga aðila á laun. Davíð stendur sig að sjálfsögðu eins og hetja enda ekki við öðru að búast af tilvonandi freslisstyttuhafa í framtíðarlandi von Islandi. IFM lánið hefur nú þegar verið greitt inná einkareikning og mun ég fjárfesta fyrir þær krónur vel og vandlega í nokkrum illa stæðum Afríkuríkjum með potential. Í raun var ég búinn að semja um þessar krónur fyrir löngu og hafði það ekkert að gera með stöðu Íslands sem er alveg í himnalagi ef betur er að gáð. Nógur fiskur, nóg vatn fyrir virkjanir og Sádana, nóg olía, nóg land fyrir olíuhreinsistöðvar og aðrar stóriðjur, nóg land fyrir vini okkar olígarka sem vilja bara dýrt og stórt og ekki skemmir mannauðurinn sem er nú eins og hann er. Ég er búinn að reikna það út að ekkert land í heiminum er betur statt fjáhagslega en Ísland miðað við höfðatölu og ef við nú reiknum það útfrá einu höfði þ.e. mínu, sem mun í fyllingu tímans fá megnið af því sem landið gefur, þá vá maður - öndin eina. En ekki misskilja mig elsku lúsirnar mínar... því þó ég deili og drottni verður það allt gert með þjóðarhag í huga. Það verður frítt í strætó og alllt ...  og höllina skal hann Bubbi fá fyrir lítið þegar hann þarf að spila og syngja guði dýrð. Varðandi gjaldmiðilinn þá hef ég ákveðið nýja valútu. Hún mun heita Ora og verður í nokkrum litum. Verður hún látinn fljóta þangað sem hentar í það og það skiptið. Annars er kominn jólaandi í mig. Kringlan og Smáralind og allar búðirnar eru svo unaðslega upplýstar og gefandi. Litla jólaönd ra ra ra ra ra ...  og gleymið nú ekki að GEFA GEFA GEFA MIKIÐ  ... það er nokkuð passlegt miðað við ástand mála að fara ekki yfir hálfa millu á kortinu þ.e. í gjafir ... milla og hálf í mesta lagi með mat.  Svo má frysta eða dreifa aðeins eftir jól.  Jólaöndin mín ra ra ra ra ra ætlar að koma í kvöld  - með buns af gjöfum ra ra ra ra ...

Athugasemdir

[Bergur Thorberg, 20.11.2008 kl. 22:44]

Mikið er gott að heyra frá þér Mammon brabra. Ég var kominn með svo mikil fráhvörf að ég var farinn að labba niður að Tjörn í vonleysi mínu. Nú verður allt mycket bra igen. Tack vare dig.

[Jens Guð, 20.11.2008 kl. 23:55]

  Mér líst sérstaklega vel á frítt í strætó.  Það eru stöðug vandræði með ökuskírteinið.

[Rannveig H, 21.11.2008 kl. 07:43]

Þetta er eins og að fá gott i skóinn,þegar þú lætur sjá þig hér.

[Heimir Eyvindarson, 21.11.2008 kl. 09:13]

Æ, mikið er gott að þú ert tekinn við . Hlakka til krýningarinnar, verður Elton?