Jóakim von Íslandi

Cayman, -  í gær.

Nú andar suðrið ra ra ra. Ég sem ætlaði að vera heima á afmælinu og taka brúkaup í leiðinni. Allt klappað og klárt, búið að taka frá svítu á Hilton og frágengið að ég sæti á milli Dorrit og Óla. En það var kúkur í lauginni, langur og svartur sem gekk frá þeirri ferð. Þegar ég kom útá völl sætmjúkur og til í heiðardalinn, þá var enginn mættur.  Það kom í ljós að Muhammi nýji flugmaðurinn minn var kominn í eitthvert bænafrí, þú veist þetta -  má ekki kúka í áttina að Mekka, ekki pissa í áttina að Mekka og ekki fljúga í áttina frá Mekka á ákveðnum andskotans degi sem reyndist vera dagurinn þegar ég ætlaði að eiga kvöldstund með Óla og Dorrit. Þegar ég hótaði að reka hann veifaði hann pappírum og benti á smáaletur sem tekur á þessu og nefndi reiði guðs í öðru hvoru orði. Gott ef hann nefndi ekki Laden líka. Það var að sjálfsögð alltof seint fyrir mig að fá annan flugmann þannig að ég varð að fara heim og horfa á útsendingu frá afmælinu á tölvunni. Nú fer ég að losa mig við þessa arabíu kalla, þeir ganga ekki alveg á öllum.  Muhammi er til dæmis með sérstakt teppi fram í flugstjórnarklefa og ef verið er að fljúga í aðra átt en Mekka á ákveðnum tíma, þá snarsnýr hann rellunni í loftinu og setur á átó pílotinn meðan hann muldrar oní teppið. Þetta er þar að auki dýrt því hann muldrar yfirleitt lengi.

Annars er ég sorgmæddur þessa dagana og ég hef svo sannarlega ástæðu til. Allt bréfadraslið mitt er á hvínandi niðurleið og sér ekki fyrir endann á þeirri skelfingu og það er allt saman ykkur aumingjunum að kenna. Magasárið hefur tekið sig upp aftur og ég drekk næstum því stöðugt til að halda því í skefjum. Að hugsa sér hvernig þið farið með landsins bestu syni. Bjarni vinur minn þessi góði drengur sem ætlaði að græða nokkur þúsund milljarða fyrir íslensku þjóðina hefur verið neyddur til að hætta við allt saman og ekki er verið að þakka þeim feðgum, og Werner, og Bjarna og Hannesi og mér fyrir ómetanlegt framlag til endurreisnar lúsatínsluþjóðarinnar. Nei ekki aldeilis, það er endalaust verið að stinga í bakið á þeim af öfundarlýð.  Og ég sem var að hugsa um að taka upp nafnið Jóakim von Íslandi.  En nú hef ég fengið nóg og segi;  til helvítis með þig - vanþakkláta þjóð.  Auðmenn Íslands sameinist og yfirgefið skerið með allt ykkar hafurtask og leyfið rímnaraulurunum að róa í gráðið.

Eins og þú heyrir frændi þá er ég reiðari útí ykkur en ég hef oft verið áður og réttlætiskennd minni er fullkomlega misboðið. Þessvegna ætla ég að drekka mig fullann í kvöld og brjóta Íslandslagadiska. Ekki hafa fyrir því að hringja í mig eða koma í heimsókn, kommúnistinn þinn. Ég er nú þegar búinn að ákveða að þú fáir ekkert.

 

 

Athugasemdir

[Ásta Steingerður Geirsdóttir, 24.11.2007 kl. 23:41]

Ekki gleyma að hringja "íslandsklukkunni"

[Halldór Sigurðsson, 25.11.2007 kl. 18:20]

En,er ekki annars allt gott að frétta úr þinni heimabyggð ?

[Steingrímur Helgason, 25.11.2007 kl. 20:21]

garg.schnilld.is

[Jón Steinar Ragnarsson, 26.11.2007 kl. 01:00]

Aumingja Jóakim með réttlætiskenndina sína, sem hann fékk í kornflekspakka. 

What goes around, comes around.

Hlakka til að koma á tónleikana þína á Domo á þriðjudaginn.  Vona að Jóakim mæti líka. Ég eitt eða tvö orð til í hans eyru.

[Guðmundur G. Hreiðarsson (IP-tala skráð) 26.11.2007 kl. 11:51]

Svo var eitt sinn spáð: "Við vinnum hrærivél þegar það sekkur Skerið".

[Ásgeir Rúnar Helgason, 26.11.2007 kl. 21:07]

Jóakim frændi Aðal Önd,

auðvalds kyrjar sálma.

Liggur súr á ljúfri strönd

og leggur fæð á Pálma.

[Pálmi Gunnarsson, 28.11.2007 kl. 19:27]

Ásta - ég ætla að gefa honum klukkur í jólagjöf,,, sem hringja með penginahljóði eins og í byrjuninni á Money með Pink Floyd. Þetta hljóð verður ekki hægt að stöðva.

Ásgeir takk fyrir ljóðið... það fer með klukkunni til Kimma.