RA RA - tilkynning frá JOAKIM VON ISLANDUS

Bahamas 21 febrúar 2008

Ágætu Íslendingar -  ég hef ákveðið að gefa kost á mér sem einræðisherra yfir Íslandi frá og með árinu 2009. Fyrir þessu eru nokkrar ástæður og mun ég seinna gera nákvæma grein fyrir þeim. En fyrst vil ég bera ykkur kveðju frá frænda mínum sem er eigandi þessarar bloggsíðu. Eftir að hann ákvað að koma fram í Evróvísíónundankeppnunununum og syngja ómeikaður og allur úr stílnum fyllibyttulag þá var mér öllum lokið. Greinilegt að maðurinn gekk ekki alveg á öllum og nú ákvað ég að grípa inní -  til þess að forða ættinni frá frekari hneisu, löngu tímabær aðgerð reyndar.  Á leið útúr útvarpshúsinu eftir að hafa skítfallið fyrir Spock og hvað þau heita, rændu útsendarar mínir honum, svæfðu og flugu með hann út til mín. Síðan þá hefur hann verið í haldi hjá mér að sötra ávaxtadrykki því ekki fæst hann til að fá sér neitt hjartastyrkjandi lengur, eins og hann hefði nú gott af því held ég.  Ég gerði honum strax ljóst að ég ætlaði að snúa honum til trúar með góðu eða illu.  Þegar honum var ljós alvara málsins lét hann undan og nú eyðum við kvöldunum saman við lestur bóka eftir Friedman heitinn og dögunum niðri í banka að skoða eignasafnið.  Ég get sagt ykkur kæru skábloggvinir að það er erfiðara en tárum taki að eiga við frænda og eftilvill er honum ekki viðbjargandi. Ég hef sýnt honum hvað bíður hans sjái hann að sér, en ég fer að efast um að nokkuð virki á drenginn.  Síðast í morgun kom ég að honum við tölvuna (sem hann á ekki að hafa aðgang að) að skrifa skammarbréf til bæjaryfirvalda á Akureyri vegna þess að það á að byggja fullt af þessum fínu íbúðaturnum á nokkrum vel völdum stöðum. Í póstinum sem ég gerði upptækan og eyddi með sama, andskotaðist hann útí umferðahávaða, loftmengun og leyfði sér þá ósvífni að halda því fram að Akureyrarbær væri að verða eitt viðamesta skipulagsslys Íslandssögunnar. Hvaða vitleysa er þetta í manninum?   Krissi Júll - fyrrverandi einræðisherra á Akureyri sem er víðsýnn maður, sá á sínum tíma að  besta leiðin og sú ódýrasta fyrir pöpulinn á Akureyri til að sjá sig almennilega um í heiminum, væri að byggja uppí loftið.  Þegar ég ók inní Akureyrarbæ um daginn, til að hitta menn út af álþynnuverkssmiðjubréfum, báru tilfinningarnar mig nær ofurliði. Byko í sínu himinbláa veldi, glæsilegar bensínstöðvar, nokkur bílaumboð og ég veit ekki hvað, stórglæsilegar iðnaðarbyggingar á báða bóga, merki um velmegun og feita sjóði, þvílík framsýni, þvílíkur stórhugur að byggja svona fallega á þessum annars agalegu skítaklöppum. 

En núna kallar Muhammi 2. á mig og er æstur þannig að ég verð að þjóta. (Muhammi 2. er nýji þjónninn minn, Muhammi 1. er flugmaðurinn minn, þeir eru ekkert skyldir) 

Bið að heilsa ykkur í bili tilvonandi þegnar hans hátignar

JOAKIM VON ISLANDUS I

Mér stendur

Samstarfsmaður minn til margra ára gerði fínan blús fyrir nokkru, lag og texta, sem verður hljóðritað innan tíðar. Upphafsorð ljóðsins eru: Mér stendur ......... ógn af mínum syndum sérhvern dag. Hér er tilvitnun í sögu tveggja klerka, góðra vina, sem áttu til að veðja grimmt um hversu langt þeir kæmust í uppátækjum fyrir framan söfnuði sína. Í þessu tilfellli var veðmálið þetta. Ef annar þeirra næði að segja orðið mér stendur þrisvar í stólræðu án þess að einhver stæði upp og ryki á dyr í vandlætingu þá byði hans kláravín að launum. Ekki mátti flýta sér að segja orðið heldur varð að hafa langar kúnstþagnir á milli orðanna.  Eftir huggulega upphitun var komið að stólræðu og hóf klerkur stólræðuna á orðunum.  Mér stendur ..........  mér stendur ......... mér stendur  .......... ógn af mínum syndum sérhvern dag!  Prestur slapp með skrekkinn, enginn rauk á dyr og ræðan þótti innblásin. Þessa sögu segi ég nú bara af því að mér finnst hún fyndin. 

Nú árið er liðið ra ra ra ra ra ra

Cayman núna, rétt eftir áramót, held ég ra ra

Nú árið er  liðið í aldanna skaut ... þó þú viljir ekkert með mig hafa þá veit ég að þér þykir vænt um mig ættarógresið þitt. Við megum ekki láta það eyðileggja fyrir okkur þó þú sért kommúnisti og ég aðhyllist kenningar Frídmanns og Hannesar ho ho ho.  Þú átt að vera í góðu og stöðugu sambandi við uppáhaldsfrænda þinn sem býr í sólinni á Cayman, á þotu og fullt af pening. En nú verður þú að drífa þig útí garð að skjóta hreindýr því ég Kimmi von superstar er á leið í bæinn. Þarf að ganga frá viðskiptum, kaupa nokkur bréf, drekka mig fullan með völdum skoðanabræðurum og skjóta upp rakettum. En fyrst og síðast ætla ég að gera lokaátak í að afkomma þig því ég mun ekki líða kommúnista í ættinni þegar ég hef tekið við stjórntaumunum. Svo þú vitir það þá hef ég ákveðið að verða rétt bráðum einræðisherra yfir Íslandi. Já þú lest rétt glámurinn þinn. Og hvernig gerist það? Ég kaupi allt sem að kjafti kemur, það er,  það sem ég hef ekki þegar keypt. Loka síðan grjóthrúgunni við Austuvöll og sendi liðið heima að gera gagn. Heldur þú að það sé hemja hvernig látið er niðrá þingi þessa dagana. Nei vinur minn skútan siglir hraðbyr til helvítis og ég ætla að koma í veg fyrir skipbrotið, enda á ég mikilla hagsmuna að gæta. Vertu búinn að þvo af þér félaghyggjusvipinn þegar ég kem heim eða þú færð að kynnast reiði minni.  Jafnrétti, feminismi, trúleysi og annað sem þvælist fyrir gömlum og góðum kristilegum gildum verður það fyrsta sem ég mun úthýsa með öllu úr framtíðarlandinu. Afkommun og afhommun verður sett í forgangsröð og Jón Valur fær umsvifalaust djobb hjá mér sem siðameistari. Heldurðu að það sé eitthvert vit í að láta svona með hann Jesús. Það má kannske segja að Jesús hafi verið félagshyggjutittur á yngri árum en sjáðu hvernig það lítur út núna. Það eru svo miklir peningar í þeim feðgum að stærstur hluti af öllum fjárfestingum mínum  í Amríku tengist þeim.  Eins og þú sért frændi þá hef ég uppi mikil áform og vil að þú eigir stað við hlið mér í framtíðinni. Rarararara ...

hey ég aftur - shit ég sé að klukkan er eitthvað vitlaus hjá mér frændi.  Þetta gerist stundum,  öll þessi ferðalög heimshornanna á milli  -  tímamismunur og allskonar stress.  En hvað er ein vika á milli vina -  Ég kem heim um jólin ra ra ra ..