Til hamingju Ísland eða hvað!

Ég hef áður bent á fína hugmynd sem væri ein allherjar lausn fyrir þjóð á vonarvöl.  Hugmyndin krefðist lítillar orku, nema í  nokkrar tölvur og rússaperur, engin sjónmengun eða lítil og MASSAGRÓÐI. Svo mikill að allir gætur keypt sér villur á sólarströnd, snekkjur og einkaþotur. Ég skil ekki af hverju í andskotanum við erum að skíta niður þessum agalegu álverkssmiðum og eyðileggja fjöll og náttúruundur með vikjanagerð, þegar við getum með einu símtali til W. Runna og Pútíns gert samning um geymslu alls kjarnorkuúrgangs djúpt í harðklöppinni fyrir austan. Þá væri nú vit í að slá upp veislu.

Álverið á Reyðarfirði opnað í dag

Súrrealískir tangóspilarar

Ég fór á tónleika með Frenandez Fierro 12 manna tangóbandi frá Argentínu sem var eitt af aðalnúmerunum okkar á AIM festival www.aimfestival.is  Ég hafði heyrt í gaurunum áður, séð með þeim myndbönd frá tónleikum og frábæra heimildamynd um hópinn sem sýnd var á RUV ekki fyrir löngu. En allt þetta bliknaði við hlið upplifunarinnar í gær. Þessi hópur ungra tangópönkara fór alveg með mig, því líkur ógnar kraftur og tilfinningahiti. Með stórskemmtilegan söngvara í broddi fylkingar, lék þessi einkennilega útlítandi götustrákahópur, sem hefur markað spor sín í tónlistarheiminn með svo afgerandi hætti, með tilfinningar mínar og annarra tónleikagesta enda átti ekki að sleppa þeim fyrr en í fulla hnefana. Gerist vart betra.

Upp upp mín sál

Ég átti orðið erfitt með að sitja kyrr undir lok tónleikanna í kvöld, sem voru eins og dóttir mín myndi segja „geðveikir, eða gett góðir“  Til að byrja með Tommi R með frábært stórband skipað toppmönnum ... æðileg grúppa og flottar tónsmíðar. Allt ætlaði af göflunum að ganga eftir hvert lag. Mér varð á að hugsa að trúlega væri ekki neitt auðhlaupaverk að taka við af þessu súperbandi en áhyggjur mínar hurfu við fyrsta tón hjá tríói Hilario Duran. Æ ég held ég láti bara vera að segja meira, það yrði of langt  ... en mikið vildi ég að þið hefðuð verið með mér í kvöld og upplifað galdurinn. En bara næsta ár. Ég lofa ennþá meiri veisluhöldum, slæ ekki af, gef ekkert eftir og hætti ekki fyrr en þið leggið á hestana og ríðið norður. Þið getið sungið á leiðinni „aldrei ætlaði ég norður “ 

Lítill er heimurinn

Eftir vel heppnaða tónleika með félögum mínum í gærkvöldi hitti ég jasspíanistann Hilario Duran , bassaleikarann Roberto Occhipinti og trommarann Mark Kelso sem heiðruðu okkur með nærveru sinni en þeir eru leika á 1929 í kvöld ásamt Tómasi R og kúbubandinu hans. Hilario er sjálfur frá Kúbu en er búsettur í Kanada og þaðan eru einnig meðspilarar hans. Hann er margverðlaunaður jazzpíanisti sem lék í hljómsveit Arturo Sandoval í fjölda ára. Hann hefur einnig leikið með goðsögnum eins og Dizzy Gillespie og Michael Legrand. Ég rifjaði upp dvöl mína í London í kringum 1980 en þá endaði hver dagur hjá mér með ferð á Ronnie Scott jassklúbbinn. Og ég var heppinn að heyra í Winston Marsalis þá nýskriðnum útúr Juliard með aldeilis geggjað jassband en Winston lagði síðan heiminn að fótum sér og er í dag án þess að á nokkurn sé hallað ókrýndur konungur tropetsins, jass - og klassísku deildarinnar. Svo voru það Kúbanskir jassistar sem gerðu allt vitlaust, stórt band með hreinum og klárum virtuosum í hverju sæti þ.á.m. Hilario Duran og Arturo Zandoval sem flúði Kúbu stuttu seinna. Ég hitti Hilario áðan niðrá tónleikastaðnum þar sem hann var að hita sig upp. Og þvílíkar upphitanir ... en hvað um það heimurinn er lítill og tónlist hrífur hrifnæma hvaðan sem hún kemur. Kúbutónlist í kvöld á einum stað og topplið úr heimspoppinu á öðrum. Annað kvöld Argentískur megatangó.

Annað kvöld verður talið í AIM festival 2007

Það er skemmtileg helgi framundan hjá mér. Alþjóðlega tónlistarhátiðin á Akureyri, AIM festival 2007 www.aimfestival.is  hefst annað kvöld. Það verður blúsað og rokkað á þremur stöðum í bænum og það er við hæfi að mörlandinn hefji leikinn. Ég fæ að vera með annað kvöld því Blús Kompaníið ásamt Hrund Ósk Árnadóttur kemur fram á 1929 ásamt Mó sem er Akureyrískt band sem leikur íslensk þjóðlög í rokkaðri útfærslu.  Á föstudagskvöld verður annarsvegar mikil jazzveisla, kúbuskotin og aðalnúmerið er kúbanski píanóleikarinn Hilario Duran ásamt hljómsveit og  Tómas R ásamt stórbandi hitar upp fyrir kappann. Á öðrum staði í bænum verður þýska útgáfan Morr music með sérstakt kvöld með innlendum og erlendum böndum, þar á meðal Benna Hemm Hemm sem nýlega gerði samning við útgáfuna. Laugardagskvöldið verður svo tileinkað Fernandez Fierro 12 manna stórkostlegu tangóbandi frá Argengtínu. Ég hef fylgst með þeim um nokkra ára skeið og þvílik hljómsveit. Svo lokum við hátíðinni á sunnudag með Sinfóníuhljómsveit Norðurlands, en einleikari með henni verður harmonikkusnillingurinn Tatu Kantoma. Það spáir bongóblíðu um helgina á Norðurlandi þannig að það er upplagt að heimsækja okkur norður, hlusta á tónlist frá öllum heimshornum, grilla, fara í sund og fá sér Brynjuís.

síjú

 

Hvenær verð ég spurður?

Tónlistarmenn eru flytjendur og höfundar, hvorugur getur án hins verið. Reyndar eru höfundar oft flytjendur að eigin efni en þó er hitt algengara höfundar þurfi flytjendur að tónsmíðum sínum. STEF hefur séð um höfundrréttarmál en FÍH um réttindi flytjenda. Einn allra þekktasti lögfræðingur landsins sem skoðaði flytjendarétt fyrir mig fyrir nokkrum árum sagði mér blákalt að réttindamál flytjenda væru á steinaldarstigi. Ég held að síðustu fréttir um fyrirtækið tonlist.is segi ofurlitla sögu af stöðu flytjenda.

Stefán Hjörleifsson sem stofnaði tonlist.is var styrktur af hagsmunasamtökum flytjenda og höfunda til að koma tonlist.is á koppinn en seldi svo afkvæmið Senu fyrir væna fúlgu og sjálfan sig með. Ég hef oft spurt mig að því hvernig það megi vera að ég sé inná þessum grunni með megnið af því efni sem ég hef flutt, án þess að ég hafi nokkurn tímann gefið leyfi fyrir slíku. Svörin sem ég fékk þegar ég fór að efast um að rétt hafi verið staðið að málum voru þau að yfirráð útgefanda yfir flutningsrétti á lögunum gæfu honum rétt til að falbjóða mig á vefnum. Þetta sé síðan allt samþykkt af stéttafélaginu mínu á þeim fosendum að verið sé að búa til gagnagrunn sem nýtast eigi öllum hagsmunaaðilum. Hafi þessi hugsun verið það sem þetta átti að snúast um þá er sú forsenda fokin út um gluggann með sölu vefsins til SENU. Þess utan tel ég afar vafasamt að það sé hægt að ákveða án samráðs við mig að tonlist.is bjóði uppá afnot af mér í mánaðaráskrift, að tonlist.is geti gefið mig í fríu niðurhali, eins og hefur gerst hvað eftir annað ef tilefni hefur verið til eins og afmæli fyrirtækisins og fleiri stórviðburðir. Ég hef aldrei samþykkt neitt af þessu, reyndar aldrei verið spurður, sem er svo sem ekki nýtt í þessum bransa.  Þegar SENA ákvað á sínum tíma að selja disk með SS pylsupakka þá var enginn spurður, þegar lög af Mannakornadiskum hafa verið sett á hina og þessa safndiskana með einkennilegum nöfum, þá er enginn spurður,  þegar jólaplata Brunaliðsins Með eld í hjarta breyttist í diskinn 11 jólalög, var enginn spurður.

Ég hef ásamt félaga mínum Magnúsi Eiríkssyni varið undanförnum árum í að fá einhverja niðurstöðu í réttindamál okkar. Sú ganga  gengur hægt en gengur þó. Ég fagna umræðunni sem átt hefur sér stað að undanförnu og hvet til að henni sé haldið áfram af fullum þunga. Yfirburða staða eins fyrirtækis á viðkvæmum og litlum markaði er vandmeðfarið vald og leiðir því miður til misnotkunar. Tónlistarmönnum er mismunað eftir því hvar þeir eru skráðir með sitt efni, stjörnugjafir á tonlist.is er bara eitt lítið dæmi um slíka misnotkun.

Þotuþreyttir fá lausn sinna mála með reisn

Þegar ég las fréttina sá ég fyrir mér fulla flugvél af fólki á Viagra ... og skömmu síðar sá ég fyrir mér ástandið í hamstrabúrinu. Síðan fór ég að hugsa - hvernig í ósköpunum duttu Argentínarnir niður á þessa lausn á þotuþreytuvandanum. Eftilvill hefur prófessor úr Þjóðarháskólanum með riserfiðleika verið á leið með flugi til elskunnar sinnar og úðað í sig Viagra fyrir flug. Er ekki möguleiki á að Viagra geti virkað á fleiri vandamál.

Viagra kann að nýtast gegn þotuþreytu

Smá plögg

Í fyrramálið í ríkissjónvarpinu    http://dagskra.ruv.is/sjonvarpid/?file=3463

þessi frábæra hljómsveit frá Argentínu verður hjá okkur á Akureyri 31 maí - 3 júní  www.aimfestival.is 

Skrýtinn fugl álftin - flýgur afturábak og veifar halanum

Þessi frasi ættaður frá Pétri Hofmann kemur oft uppí huga minn þessa dagana. Satt best að segja þá eru tilfinningar mínar á svipuðu flugi og álftin hans Péturs.  Eftilvill eru þetta einhversskonar kosningatimburmenn í bland við þá óljósu stöðu sem nú ríkir sem veldur þessu. Þar til fyrir nokkrum árum hélt ég því fram við hvern sem vildi vita, að engu máli skipti hvaða rassar vermdu stólanan í steinhúsinu við Austurvöll. Það eina sem skildi þá að væru kyn rassanna, mismunandi stærðir og ásigkomulag. 

Innst inni held ég að ég hafi vitað betur og í seinni tíð fer ég í feita fýlu útí sjálfan mig þegar ég hendi þessari ábyrgarlausu hugsun hins pólitíska viðrinis á loft. Um margra ára skeið lét ég mér útkomu kosninga litlu varða og tengdi þær gjarnan við gott partí með nokkurra daga aðdraganda og nokkurra daga grande finale. Þetta partístand hafði það í för með sér ég varð oft að spyrja til vegar í hinu pólitíska landslagi þegar veislunni lauk.  En nú eru áherslurnar skýrar og þær hafa fyrst og fremst með manngildi og virðingu fyrir náttúrunni að gera. Þjóðfélag sem sinnir af alúð þeim sem minna mega sín og fer vel með landið sem það hefur fengið að láni frá afkomendum sínum stendur traustum fótum. Þjóðfélag sem einkennist af græðgi og spillingu leiðir á endanum til glötunar. Og nú sýnist mér að álftin sé farin að fljúga um það bil eins og hún á að fljúga. Þ.e. afturábak og veifa halanum.

Þjóðarsátt - þjóðarsátt - þjóðarsátt

Ég er kominn heim í heiðardalinn eftir bráðskemmtilega ferð í höfuðborgina. Söng með Palla á Nasa og fór svo heima að horfa á kosningasjónvarp en missti meðvitund eftir að Guðmundur Steingríms hafði fellt stjórnina nokkrum sinnum. Íslenskri þjóð óska ég til hamingju með sigurinn í kosningunum. Allir virðast hafa unnið stórsigur sem þýðir að þjóðin er sigurvegarinn en það vekur mig til umhugsunar um hvort eitthvað sé í íslenska kranavatninu sem rugli boðefni í heilum landsmanna. 

Víst er að íslenska þjóðin uppskar eins og hún sáði og nú þýðir ekkert annað en bretta upp ermar og þjóðarsátta til hægri og vinstri. Þjóðarsátt um allar virkjanirnar sem á að reisa og öll fallvötnin sem á að temja er fyrst á dagskrá. Þjóðarsátt þarf um einkavæðingu þeirra horrimarfyrirtækja sem ennþá eru í eigu ríkisins og þjóðarsátt um kosningaloforðavíxilinn uppá nokkur hundruð milljarða sem gefinn var út fyrir kosningar er á forgangslista. Það þarf að nást sátt um þjóðarauðlindina þ.e. hversu langt megi ganga í að svindla á kvótakerfinu. Best að láta LÍÚ og sjávarútvegsráðherrann um þá hugmyndavinnu, þeir eru hagvanir. Ef illa gengur að ná lendingu má fá Kristján Júl og Þorstein Baldvins til að lemja sáttina saman. 

Ná þarf sátt um gamlingjavandann þ.e. hversu langt megi ganga á rétt þeirra án þess að það fari yfir velsæmismörk og það sama á að sjálfsögðu við um alla minnihlutahópa sem þvælast fyrir í þjóðfélaginu og gera ekkert annað en vera með leiðindi og heimta aukin útgjöld. Ná þarf sátt um sölu lands til fárra útvaldra, sú sátt gæti miðast við hversu mikil ítök jarðarkaupendur yrðu að hafa í fjármálastofnunum. Svo legg ég til útgáfu á 2012 með Ómari og Jóni Sig. Klárlega hittari og myndi greiða götu sátta um allt milli himins og jarðar. 

Nú þarf ég að fara að hugsa um eitthvað annað en pólitík því framundan er alþjóðleg tónlistarhátíð á Akureyri. Ég veit ekki hvort þið sáuð heimildamyndina um argentísku tangóhljómsveitina í sjónvarpinu í gærkvöldi en þessi ótrúlega hljómsveit verður eitt af aðalnúmerum hátíðarinnar. Ef þið sáuð ekki þáttinn þá verður hann endursýndur næsta sunnudagsmorgun, missið ekki af honum fyrir nokkurn mun. Svo í framhaldinu gætuð þið brugðið undir ykkur betri fætinum helgina 31 maí - 3 júní og komið norður á hátíð. Fyrir forvitna læt ég link heimasíðu hátíðarinnar fylgja með  www.aimfestival.is