Volga Olga

Pétursborg 26 -7 -2009

Eins og staðan er í dag geri ég lítið annað en telja peninga með  volgu Olgu nýja einkaritaranum mínum. Hér er sko alltílagi get ég sagt ykkur aumingjarnir ykkar. Já helvítis aumingjarnir ykkar... þið sem slóuð snillingana útaf borðinu - hentuð framtíðardrengjunum fyrir borð og eruð svo að tala um að þeir hafi sett allt á hausinn. Þið settuð sjálf allt á hausinn. Þegar þessir snillingar buðu þjóðinni uppí dans þá var ekki verið að bjóða uppí maraþondans. En þið steinláguð ... duttuð í það asnarnir ykkar. 100 milla hús. Tveir 20 millu bílar, sumarbústaður í Borgarfirði, utanlandsferðir -  krús í Karabíska. Og nú sitjið þið í súpunni og strákarnir ykkar eru farnir og koma aldrei aftur. Réttast væri að skella girðingu utan um helvítis skerið og setja hengilás á. Fyrir utan mætti hafa skilti sem á stæði - Hætta á aumingjasmiti. Eins og þið sjáið þá er frændi illur útí þjóðina sína, þ.e. fyrrum þjóðina sína því ég er búinn að skipta um ríkisfang. Núna er ég ríkisborgari í Ubekistan og er með second ríkisfang í Rússlandi. Og ég græði og græði og græði, á peningunum sem ég fór með frá Íslandi daginn fyrir hrun. Þið vitið það að sjálfsögðu ekki en hér upplýsist það. Ég hreinsaði út úr öllum mínum hvelfingum og bar í stórum töskum í Learjettið nokkrum dögum áður en Geir bað til guðs. Ég hef alltaf verið snillingur þegar kemur að fjármálum, ég var búinn að sjá þetta allt fyrirfram eða eigum við kannske að segja ég var búinn að setja þetta allt saman í gang á meðan þið voruð að taka myntkörfulánin ykkar. Nú fer ég að sinna henni volgu Olgu og ætla aldrei að láta heyra í mér framar. Vonandi kemur einhver og kaupir skerið og bjargar ykkur en það verður ekki ég.

Jóakim von arrgggand

 

Ég er farinn vertu sæll

Hef ákveðið að yfirgefa skerið fyrir full og allt með því að afsala mér ríkisborgararétti -  vil ekki láta bendla mig við þjóð sem fer svona með landsins bestu syni. Menn sem sáu tækifæri og nýttu sér þau í þágu lands og þjóðar eru nú hundeltir af gráðugum lýðnum - sve attann ... þá er nú betra að vera Rússneskur ríkisborgari

 Jóakim argi

Ra ra ra ra

 Tortola  -  suðaustan 3 léttskýðja 3o°

Ágætu landar ... ég nýtti mér tækifærið meðan frændi lá í andnauð eftir hangikjötsátið til að svindla mér inná bloggið hans.  Ég veit að þið hafið áhyggjur af þessum aurum sem hurfu eins og dögg fyrir sólu en það eru ástæðulausar áhyggjur. Seðlarnir eru vel geymdir og ég get lofað að þeim verður vel varið. Ekki vera vond við strákana okkar, þeir voru bara að gera það sem allir þráðu að gera, voru bara fljótari en næsti maður. Ég reikna með að þetta verði allt komið í stakasta lag hjá ykkur eftir svona tuttugu ár, þjóðin er fylgin sér og harðdugleg að borga það sem á hana er lagt á erfiðum tímum. Hreinlega þekkt fyrir dugnað. Ekki skemma greiðsluaðlaganir, framlengingar á lánum og fleira gott til að laga stöðuna. Allt gert fyrir ykkur til að létta aðeins undir á erfiðum tímum.  Ég hef hinsvegar ákveðið að slíta öll sambönd við landið mitt. Mun engu að síður koma í lax af og til og svo auðvitað ef einhver almennileg tækifæri gefast sem ég efast nú um að verði í minni tíð. Nú fjárfesti ég í Afríku og boy ó boy. Þar er sko gaman að athafna sig. Ódýrt vinnuafl - orð eins og mútur finnast ekki í þarlendum orðabókum.  

ra ra frá Jóakim von Súpertramp

Nýtt Ísland jibbíjei

Á haustmánuðum hrundi stórveldið Ísland. Til að því sé nú haldið til haga þá er Íslenska þjóðin sögð með hamingjusömustu þjóðum í heimi, þjóð með stórmerkilegri sögu, reyndar í styttri kantinum, bestu sjávarútvegsstefnu sem fyrirfannst á byggðu bóli og fleira og fleira sem ekki er ástæða til að tíunda svo vel þekkt sem það er. Ekki lækkaði flugið þegar tekið var til alheimsfjármálin. Snillingar skutust út úr hverjum hól og nú skyldi skjóta Íslandi til æðstu metorða á stjörnum skrýddum frjálshyggjuhimni Hannesar og Friedmans. London, Kaupmannahöfn, Luxemborg, Jómrúareyjar, Tortola. Öllum þúfum smáum sem stórum velt við í leit að klinki, allt keypt sem á vegi varð og svo alltíeinu BÚMM - veislan á enda og skútan komin með slagsíðu. Þegar ljóst var að hverju stefndi spýtti almenningur í lófa og skundaði í mótmæli með búsáhöld sem barin voru í hinum margutalaða rímnafúnktakti og galopinn kjaftinn að vopni. Krafan var; ríkisstjórn Íslands í burt, Davíð úr Seðlabankanum, fjármálaeftirlitið í ný föt keisarans og kosningar í grænum hvelli. Hæ hó jibbíjei og jibbíjei, bráðum komin 25 apríl. Nýtt lýðveldi, nýtt Ísland nýtt þetta nýtt hitt. Jísús kræst, alltíeinu var eitthvað svo nýtt að vera til. Þá fyrst skildi ég svipinn á kínversku ungmennunum, bjartan, opinn svip hins kúgaða kínverska verkalýðs sem fann lausnina í búlduleitum ofreikingamanni og laumuperra. Þá skildi ég myndirnar af öllum ljóshærðu Gertrtrútunum og bláeigðu Aríastrákunum sem mændu opnum aðdáunaraugum á lausnarann- eineistinginn, laumugyðinginn, grænmetis- og amfetamínætuna Adolf Hitler. Nú er kreppa á Íslandi eins og var í Kína og Þýskalandi og fleiri stöðum og í beinu framhaldi verður allt svo nýtt. Jafnvel gamlir símastaurar verð sem nýir og syngja ættjararlög. Ég hef persónulega ákveðið að vera alveg nýr héðan í frá. Það þýðir í raun að ég mun lúsahreinsa af mér gamla lífið og stökkva um víðan völl endurreistur með bjartan svip eins og Kinversku ungmenninn á byltigarmyndunum. Ég ætla að byrja á því að fara í bankann minn á morgun og fá skuldabréfin sem tilheyra gamla mér og eru á mínu gamla nafni og láta setja þau í tætarann fyrir mig. Síðan renni ég við hjá þeim í Credidifo og læt eyða persónuupplýsingum um heldur fátæklegan feril minn á fjármálasviðinu. Jafnvel fara fram á að sjoppunni verði lokað í eitt skipti fyrir öll. Aldrei var ég beðinn um afnot af persónuupplýsingum um mig og því síður að þær gætu gengið kaupum og sölum. Það er spurnig hvort það ætti ekki að senda þeim reikning fyrir afnotunum. Hann þarna frá Írak hefur trúlega ekki verið á vanskilaskrá þegar hann fékk hundrað milljarða yfirdráttinn hjá Kaupþing á dögunum. Eða Jón þungarokkari þegar hann fékk lánið fyrir íbúðinni á Manhattan og Stöð 2.

En hvað er ég að væla, allar vorar búksorgir eru fyrir bí -  nýtt Ísland, nýir símastaurar, nýr ég, nýr þú. 

Ekkert er ómögulegt; allt.

Trúarjátning Jóakims

Ég trúi á heilagan Mammon, skapara ómældra auðæva.
Ég trúi á einkavæðingu, mótþróalausa afhendingu þjóðarauðs og létta spillingu
Ég trúi á flokkinn minn,
leiðtogann minn,
samfélag útvalinna fjármálasnillinga,
fyrirgefningu smá-meðal og stórra yfirsjóna,
upprisu fallinna fjármálamógúla  
og eilíft brask.

YEN-MEN

 

Þegar skipið sökk

Það hafði flotið lengi áfram þetta far,
flotið yfir margar slæmar grynningar,
margir snjallir höfðu stýrt
og það hafði oft verið dýrt
að gera gamla dallinn út.
 
Það var kominn lúmskur leki að lestinni,
lamað allt um borð og lent í rassgati,
í flækju komin nót og blökk,
undiraldan þung og dökk
daginn þegar skipið sökk.
 
Og ég sver að upp í brú
þar stóð enginn stýrið við
stjórnlaust skipið sigldi á hlið.
 
Þeir höfðu stolið öllu ætu úr búrinu,
rottur höfðu flúið burt af skipinu,
skipstjórinn fékk skömm í þökk,
og í sjóinn loks hann stökk
daginn þegar skipið sökk.
 
Þessi sjóferð hafði verið löng og ströng
í óratíma hafði stefnan verið röng
þeir sem flæktu nót og blökk
fengu að taka heljarstökk,
daginn þegar skipið sökk.

Mannakorn  Í ljúfum leik 1985 

Hannes Hólmsdradamus

Ráðherra kynningamála í stjórn Jóakims von Islandi

 

Hallgrímur þó!! nú er öndin sár; sniff sniff - erda frá Kólumbíu Mína?

Ísland er stjórnlaust, því enginn því stjórnar
Ísland er fleki af dýrustu gerð
Ísland er landið sem Flokkurinn fórnar
Ísland á reki í sjónum þú sérð

Ísland í forsetans orðanna skrúði
Ísland sem bankana auðmönnum gaf
Ísland sem sonanna afrekum trúði
Ísland er land sem á verðinum svaf

Íslensk er þjóðin sem allt fyrir greiðir
Íslensk er krónan sem fellur hvern dag
Íslensk er höndin sem afvegaleiðir
Íslensk er trúin: "Það kemst allt í lag"

Íslensk er bjartsýna alheimskuvissan
um íslenskan sigur í sérhverri þraut
Íslensk er góðæris átveisluhryssan
sem íslenskan lepur nú kreppunnar graut

Ísland er landið sem öllu vill gleyma
sem Ísland á annarra hlut hefur gert
Íslenska þjóð, þér var ætlað að geyma
hið íslenska nafn sem þú hefur nú svert

Íslandi stýra nú altómir sjóðir
Ísland nú gengur við betlandi staf
að Íslandi sækja nú alls konar þjóðir
Ísland er sokkið í skuldanna haf

Litla Jólaönd ra ra ra ra ra

Kæru landar - eins og ég hef lofað ykkur þá mun allt verða betra eftir að ég hef tekið við.  Reyndar er ég tekinn við þannig lagað, en hef ákveðið að fresta krýningu meðan verið er að laga til eftir víkingana mína. Enda öndin hógvær og lítillát að upplagi. Ég hef þó haft nokkuð með mál að gera eftir að ég kom til landsins og hef hitt ábyrga aðila á laun. Davíð stendur sig að sjálfsögðu eins og hetja enda ekki við öðru að búast af tilvonandi freslisstyttuhafa í framtíðarlandi von Islandi. IFM lánið hefur nú þegar verið greitt inná einkareikning og mun ég fjárfesta fyrir þær krónur vel og vandlega í nokkrum illa stæðum Afríkuríkjum með potential. Í raun var ég búinn að semja um þessar krónur fyrir löngu og hafði það ekkert að gera með stöðu Íslands sem er alveg í himnalagi ef betur er að gáð. Nógur fiskur, nóg vatn fyrir virkjanir og Sádana, nóg olía, nóg land fyrir olíuhreinsistöðvar og aðrar stóriðjur, nóg land fyrir vini okkar olígarka sem vilja bara dýrt og stórt og ekki skemmir mannauðurinn sem er nú eins og hann er. Ég er búinn að reikna það út að ekkert land í heiminum er betur statt fjáhagslega en Ísland miðað við höfðatölu og ef við nú reiknum það útfrá einu höfði þ.e. mínu, sem mun í fyllingu tímans fá megnið af því sem landið gefur, þá vá maður - öndin eina. En ekki misskilja mig elsku lúsirnar mínar... því þó ég deili og drottni verður það allt gert með þjóðarhag í huga. Það verður frítt í strætó og alllt ...  og höllina skal hann Bubbi fá fyrir lítið þegar hann þarf að spila og syngja guði dýrð. Varðandi gjaldmiðilinn þá hef ég ákveðið nýja valútu. Hún mun heita Ora og verður í nokkrum litum. Verður hún látinn fljóta þangað sem hentar í það og það skiptið. Annars er kominn jólaandi í mig. Kringlan og Smáralind og allar búðirnar eru svo unaðslega upplýstar og gefandi. Litla jólaönd ra ra ra ra ra ...  og gleymið nú ekki að GEFA GEFA GEFA MIKIÐ  ... það er nokkuð passlegt miðað við ástand mála að fara ekki yfir hálfa millu á kortinu þ.e. í gjafir ... milla og hálf í mesta lagi með mat.  Svo má frysta eða dreifa aðeins eftir jól.  Jólaöndin mín ra ra ra ra ra ætlar að koma í kvöld  - með buns af gjöfum ra ra ra ra ...

Nú anda suðrið og ra ra ra ra ra ra

Í 30 þúsund fetum í þotunni á leið til gamla landsins

Einhver stórkostlegasti stjórnmálamaður íslandssögunnar er Davíð Oddson. Ekki versnaði það þegar hann fékk bankastjórastólinn. Ég mun umsvifalaust rífa niður styttuna af Jóni Sig og smíða eina risastóra af Davíð í staðinn. Lögskipaðir verða Davíðs dagar og líka Dóra dagar. Gefin verða frí,haldnar ræður og lesið uppúr verkum þessara snillinga sem lögðu grunninn af því sem koma skal á næstu öldum. Hugsið ykkur þessa dásamlegu menn. Þeir hafa á örskömmum tíma sýnt einu stykki óstýrlátri þjóð hvernig á að stjórna. Já víst hefur þú verið óþekk mín kæra þjóð, það þurfti að rasskella ykkur aðeins. En nú þegar búið er að draga úr ykkur hrygglengjuna er ekkert annað eftir en að byggja ykkur upp aftur í anda hinnar einu sönnu einstefnu sem kennd er við Jóakim Frideman Hannes von Islandi. Í því framtíðarlandi þurfið þið ekki að hafa áhyggjur af neinu öðru en því að greiða af lánunum ykkar og vera góð við hvort annað. Það er einfalt líf.  Hin almáttugi og alltumvefjandi umhyggjufaðmur landföðurins Jóakims von Islandi, hins uppljómaða Andavisna sér um allt hitt. Ég veit að höggið var dálítið fast en það gleymist fljótt.  Nú er bara að drífa sig í bankann og biðja um greiðslufresti eða skuldbreytingar til næstu 70 ára og ég get lofaði ykkur því að það mun allt verða samþykkt, reyndar þarf ég að láta hækka aðeins við ykkur vexti en þar eruð þið á heimavelli og hagvön. Svo er staðan þannig á alheimsmörkuðum núna að enginn gjaldeyrir verður til næstu áratugi þannig að nú er bara að ferðast innanlands. Ekkert utanlandsráf eða nám í öðrum löndum enda landið fagurt og frítt og fannhvítir jöklanna tindar ra ra ra, og skólar á öðru hverju götuhorni. Innflutningur verður lítill en mikið flutt úr landi af áli og slíku. Til að mæta ofboðslegri fjárþurf þjóðarinnar verður nokkrum álverum rutt upp. Þauverða rekin með fríu vinnuafli.  Það verður nokkurskonar herkvaðning - 2-3 ár í álveri, til heilla fyrir land og þjóð, fjallkonan fríð og allt það. Eitt ætla ég svo að biðja ykkur um. Í guðanna bænum hættið nú að öfundast útí Hannes og strákana okkar. Þeir eru nú þegar komnir í fulla vinnu hjá mér á Cayman og fleiri stöðum, reynslunni ríkari eftir rússibanann. Hinir sem voru aðeins minna þekktir eru nú þegar farnir að stjórna nýju bönkunum mínum.  Þeir ekkert annað en gott skilið Hannes, Bjarni hinir þarna Sigurðarnir, eins hart og þeir lögðu að sér við útrásina. Það má ekki gleyma því að þeir komu jú Íslandi á kortið.  Mikið voðalega fann ég til með Fonsaranum um daginn ... hugsið ykkur að þurfa að láta heilt flugfélag falla svona og ég átti hreinlega erfitt með að halda aftur af mér. En það má alltaf finna annað flugfélag. Til að draga enn frekar úr áhyggjum ykkar þá hef ég nú þegar keypt allar skulbindingar landsins erlendis og allt komið í stakasta lag á þeim bæjum og Hannes snillingur er á leið heim til að taka við starfi sérstaks ráðgjafa hjá öndinni. Ísland er land þitt ra ra ra ra ra ra. Farið nú að láta ykkur hlakka til allra jólatónleikanna og hafið ekki áhyggjur af áfenginu, það verður lækkað aftur, ég sé um mitt fólk.  Rúdólf með rauða nefið ra ra ra ra ra ra ra.